From sentto-44114-15639-1031788768-lojban-in=lojban.org@returns.groups.yahoo.com Wed Sep 11 17:00:04 2002 Received: with ECARTIS (v1.0.0; list lojban-list); Wed, 11 Sep 2002 17:00:04 -0700 (PDT) Received: from n15.grp.scd.yahoo.com ([66.218.66.70]) by chain.digitalkingdom.org with smtp (Exim 4.05) id 17pHOq-0006S6-01 for lojban-in@lojban.org; Wed, 11 Sep 2002 17:00:00 -0700 X-eGroups-Return: sentto-44114-15639-1031788768-lojban-in=lojban.org@returns.groups.yahoo.com Received: from [66.218.67.192] by n15.grp.scd.yahoo.com with NNFMP; 11 Sep 2002 23:59:29 -0000 X-Sender: jjllambias@hotmail.com X-Apparently-To: lojban@yahoogroups.com Received: (EGP: mail-8_1_1_3); 11 Sep 2002 23:59:28 -0000 Received: (qmail 393 invoked from network); 11 Sep 2002 23:59:27 -0000 Received: from unknown (66.218.66.217) by m10.grp.scd.yahoo.com with QMQP; 11 Sep 2002 23:59:27 -0000 Received: from unknown (HELO hotmail.com) (216.33.241.206) by mta2.grp.scd.yahoo.com with SMTP; 11 Sep 2002 23:59:27 -0000 Received: from mail pickup service by hotmail.com with Microsoft SMTPSVC; Wed, 11 Sep 2002 16:59:27 -0700 Received: from 200.69.6.43 by lw8fd.law8.hotmail.msn.com with HTTP; Wed, 11 Sep 2002 23:59:27 GMT To: lojban@yahoogroups.com Bcc: Message-ID: X-OriginalArrivalTime: 11 Sep 2002 23:59:27.0907 (UTC) FILETIME=[432FFF30:01C259EF] From: "Jorge Llambias" X-Originating-IP: [200.69.6.43] X-Yahoo-Profile: jjllambias2000 MIME-Version: 1.0 Mailing-List: list lojban@yahoogroups.com; contact lojban-owner@yahoogroups.com Delivered-To: mailing list lojban@yahoogroups.com Precedence: bulk Date: Wed, 11 Sep 2002 23:59:27 +0000 Subject: [lojban] Le petit prince - IV Content-Type: text/plain X-archive-position: 1170 X-ecartis-version: Ecartis v1.0.0 Sender: lojban-list-bounce@lojban.org Errors-to: lojban-list-bounce@lojban.org X-original-sender: jjllambias@hotmail.com Precedence: bulk Reply-to: lojban-list@lojban.org X-list: lojban-list ni'o taiku mi ba'o facki lo remoi ke vajni datni noi du'u le ny krasi plini cu ja'aru'e zmadu lo'e zdani le ka barda ni'o la'e di'u mi na ka'e mutce spaji i mi djuno le du'u pa'a lei barda plini no'umu'a la terd joi la jupiter joi la mars joi la venus vu'o noi da ke'a zu'i cmene cu zasti fa ji'a loi xecto be lo'e drata noi su'oroi tai cmalu ja'e le nu nandu fa le nu viska ke'a sepi'o lo darvistci i ca le nu lo tarskepre co'a facki fi paboi xy kei lo namcu xy cmene ty i mu'a cmene fa lu le plinycma po'u li 3251 li'u ni'o mi jinvi fo loi se junri fe le du'u le plini poi terdi le cmalu noltrube'a cu me le plinycma po'u li B612 i papo'oroi viska le di'u plinycma sepi'o lo darvistci i lo turko tarskepre cu go'i ca li 1909 ni'o ty banli jarco le ty te facki bu'u lo tarske ke sornai nunjmaji i ku'i noda lacri ty mu'i tu'a le ty taxfu i lo'e makcu prenu cu tamsmi ni'o xamgu le nunmisno pe le plinycma po'u li B612 fa le nu lo turko raitru cu bigygau le ry se turni le nu dasni tai lo'e ropno i le tarskepre cu rere'u jarco ca li 1920 fau le nu dasni lo melmapti mutce i ca le ca krefu roda tugni ty ni'o mi te lisri le plinycma po'u li B612 lei di'u tcila do gi'e lacri do tu'a le py namcu ki'u tu'a lo'e makcu prenu i lo'e makcu prenu cu prami lo'e namcu i ca le nu do py tavla lo cnino pendo kei py noroi te preti le vajrai i py noroi cusku lu ma sance le ra voksa i ra zmanei le mo nunkei i xu ra crepu loi toldi li'u i py preti cusku lu ra nanca li xo i xoda tunba ra i ra ki'ogra li xo i le ra patfu cu jerna lo'e rupnu be li xo li'u ibabo py jinvi le du'u cypy slabu py i va'o le nu do cusku fi lo'e makcu prenu fe lu mi pu viska lo melbi zdani ne loi xunblabi bliku zi'e noi loi xrulrgeraniu cu zvati lei canko zi'enoi loi tcacpi cu cpana le drudi li'u kei py na kakne le nu se xanri le zdani i ei cusku lu mi pu viska lo zdani pe lo'e rupnu be li panonoki'o isemu'ibo py ki'asku lu ua melbi li'u ni'o taiku va'o le nu do cusku lu je'urja'o le du'u le cmalu noltrube'a cu zasti kei fa le nu ny manci gi'e cmila gi'e djica lo'e lanpanzi i le nu da djica lo'e lanpanzi cu je'urja'o le du'u da zasti li'u kei py galgau lei janco gi'e tarti tai le nu do verba i ku'i va'o le nu do cusku lu ny se terdi le plinycma po'u li B612 li'u kei py se birtygau gi'enai jai fanza do fai tu'a lei py preti i py tamsmi la'e di'u i ei na xebni py i e'i lo'e verba cu mutce fraxu lo'e makcu prenu ni'o ki'u li'a ma'a poi jimpe fi le nunjmive cu ckasu lo'e namcu i au mi co'a te lisri fi dei tai tu'a lo'e crida lisri i au mi cusku lu puzuvuku le cmalu noltrube'a cu xabji lo terdi poi ja'aru'e zmadu ny le ka barda ku'o gi'e nitcu lo'e pendo li'u i du'o lo'e jimpe be fi le nunjmive la'e di'u simlu le ka zmadu fi le ka jetnu ni'o ki'uku mi na nelci le nu zu'i xalbo tcidu le mi cukta i mi lifri lo tai se dunku fau le nu mi te lisri fi le dei se morji i za lo nanca be li xa le mi pendo pu klama co kansa le py lanpanzi i mi troci le nu skicu py kei tezu'e le nu na tolmorji fi py i badri fa le nu tolmorji fi lo pendo i ro prenu na se pendo da i mi ka'e binxo lo'e makcu prenu noi se cinri no na'e bo loi namcu i ki'u la'e di'u ji'a mi pu te vecnu lo skari joi pinsi tanxe i nandu fa le nu zu'i za'ure'u co'a pirfi'i ca le nu nanca le memimoi kei kei va'o le nu zu'i noroi troci le nu co'e lo drata be lo kalri sincrboa a lo ganlo sincrboa ca le nu nanca li xa i li'a mi ba troci le nu pirfi'i loi traji be le ka simsa bei fo lei selka'e i ku'i mi ne mulno birti le du'u snada i lo pixra cu mapti i lo drata na'e simsa i mi milxe srera ji'a tu'a le ka barda i viku le cmalu noltrube'a cu dukse le ka barda i vaku dukse le ka cmalu i mi senpi ji'a fi le skari be le ny taxfu iseki'ubo mi juxre troci tai ti tai ta ja'e lo zabna ja'e lo mabla i mi ba srera tu'a loi vajni mutce tcila i ku'i ei fraxu mi la'e di'u i le mi pendo noroi ciksi i ju'ocu'i py jinvi le du'u mi simsa py i ku'i uinai mi na kakne le nu viska lo'e lanpanzi pa'o lo'e tanxe i ju'ocu'i mi milxe simsa lo'e makcu prenu i la'a mi pu tolci'obi'o ---------------------- mu'o mi'e xorxes _________________________________________________________________ Join the world’s largest e-mail service with MSN Hotmail. http://www.hotmail.com ------------------------ Yahoo! Groups Sponsor ---------------------~--> Home Selling? Try Us! http://us.click.yahoo.com/QrPZMC/iTmEAA/MVfIAA/GSaulB/TM ---------------------------------------------------------------------~-> To unsubscribe, send mail to lojban-unsubscribe@onelist.com Your use of Yahoo! Groups is subject to http://docs.yahoo.com/info/terms/