Date:         Sun, 20 Sep 1998 01:15:56 -0300
Reply-To:     "=?us-ascii?Q?Jorge_J._Llamb=EDas?=" <jorge@INTERMEDIA.COM.AR>
Sender:       Lojban list <LOJBAN@CUVMB.BITNET>
From:         "=?us-ascii?Q?Jorge_J._Llamb=EDas?=" <jorge@INTERMEDIA.COM.AR>
Subject:      Re: jbopemci
To:           Multiple recipients of list LOJBAN <LOJBAN@CUVMB.BITNET>
Message-ID: <906265717.1112299.0@listserv.cuny.edu>
Content-Length: 3743
Lines: 131


>coi xorxes. a'u lojbo stura ji'a .i la'edi'u marji jismu la jbotut. i
>fu'epe'a lei dertu be leri foldi be'o .e lei dinju selci be leri tcadu fu'o
>cu cinri vajni ko'a goi lo terpemci noi bilga lenu ke'a pilno le dertu .e
>le dinju selci le sinxa .e le tanru vu'o poi cupra leko'a bangu senva

i ie sencau i mi jimpe le du'u le lojbo po'u le bangu a le stura
cu xlura le terpemci le nu finti i ku'i mi se nandu le nu jimpe le du'u
caku la jbotut ka'e ruxti'i so'i da i la jbotut ca xanri gi'u ba zasti
i ji'a xanri ro le jbopre pamei enai le jbopre romei i mi na ganse
lo cecmu poi ke'a lo steci balvi cu platu gi'a pajna i xu lo pemci be
la jbotut ka'e minra da poi le terpemci na finti ke'a

>no'i ta'u le cinmo cu na djuno le cmene le selcni .ije le selcni cu na
>cusku vo'a .ije le cinmo le selcni cu djuno tega'a po'o le zvati nu tolju'o

i ki'anai i le cinmo cu viska le ctino enai le selti'o enai le terti'o
gi'e kanji le nu le selcni e le tercni cu zasti

>no'i ca'i la pleiton. ku ku loi turni cu bilga lezu'o tadni le prije larcu
>.i caze'eku vajmau fa loi prenu poi jdice tu'a lonu vecnu je jdima .i di'u
>zo'u lo dunli pe'a go'a mi'u zo'o

i loi veldi'a cu zasni vajmau i ku'i ma morji fi vy ba le nu vy morsi
i loi pijlartadni su'oroi snada le nu vi'ozma

>no'i lo cinmo bebna na'o cusku lo cinda'i ke basti selcni ku .uonai
>.isemu'iku je'unai le pruxi fi le menli nunsre cu pante .i lu le toldanmo
>vau li'u tcita di'e .itu'e
>
>.i'oro'u
> puzi nicte
>.i solji crino
> fa le sodna gusni
>be lei cabycte pezli
>
>.i .i'iro'i
> bazi voksa
>.i solji grusi
> fa le sodna gusni
>be le cabycte klaji
>
>.i le drani be'a
> ve klama mi'a
>pa'o tepygau
> roklarcu bo bemtai
>.i .o'o .i .u'o
> .i .aidai mo'u nu klama
>
>.i cfine dinju
> .i do morji zo'e
>.i mi morji seba'i
> ku le sance poi narzva
>.i pe'a bumru marji
> .i mi le cradi pu tirna
>
>le mi jorne selmo'i
> .i voksa .i simsa
>.i le zbabu fomselci
> cu stali ze'u
>je za'o
> .i ranmi co dimna nunspo
>
>.i le voksa pe do
> ku'i
>cu marbi je se xabju
> .i nenri le mabla voksa
>goi ko'a fa le dunku
> pe ji'e lo mu'e tolraclybi'o
>
>.i mi na mo'u jimpe ti
> .i savru .i ve vimcu
>.i ko'a gusni pagre
> pe'a be'i le fetsycevni
>tarci da'inai
> .i puzuku lei terpemci ti djuno
>
>je na jimpe mo'u
> ji'a .i ko'a lisri
>le dimna .e le nunspo
> .e le za'i prami kei
>poi ranji fi le roltei
> .i la'edi'u zo'u zukte ma
>
>.i .uacai mi pu toldra
> .i mi zifre .i do prami
>.i vi le purci ku ku zo'e
> ka'e krici ledu'u
>vo'a zifre kei .onai
> ledu'u nalzi'e
>
>.i caze'e ku zo'e
> go'i .i da po'o
>poi lifri le banli nunprami
> zo'u da jetnu tavla
>figa lo za'i zifre
> gi lo za'i to'erzi'e
>
>tu'u

i lu bancu le fanmo li'u tcita le di'e pemcrsoneto i tu'e

xu do morji le du'u roda cfari
ui uinai ca le nu mi'o ctasi'u
gi'e birti le du'u ze'e jdari
fa le mi'o nunprami ro funxi'u

danre i oi mi troci le nu jgari
do i ku'i mi fliba le nunri'u
i do nitcu barsisku loi datskari
i na mansa do fa le mi pelzi'u

i lei smacla lei fegvla zo'u tcila
i lei tolzva noi ca'o masno sraku
le terki'i iu zo'u cmalu cfila

i pau mi fi'o selfra di'u caku
gi'i zifre je surla cladu cmila
gi secau le kamckeji co'a klaku

>ni'o .i'esai le lu roroi nicte li'u pemci cu rairxau .i le remoi pemci cu
>xamgu ji'a co'o mi'e maikl.

ki'e co'o mi'e xorxes