Date:         Sat, 5 Sep 1998 00:26:43 -0300
Reply-To:     "=?us-ascii?Q?Jorge_J._Llamb=EDas?=" <jorge@INTERMEDIA.COM.AR>
Sender:       Lojban list <LOJBAN@CUVMB.BITNET>
From:         "=?us-ascii?Q?Jorge_J._Llamb=EDas?=" <jorge@INTERMEDIA.COM.AR>
Subject:      Re: jbopemci
To:           Multiple recipients of list LOJBAN <LOJBAN@CUVMB.BITNET>
Message-ID: <904967015.2123265.0@listserv.cuny.edu>
Content-Length: 2869
Lines: 93


>coi xorxes.
>no'i zu'i lo'e selcru cu  jimpe va'o lenu vo'a nalsanji smadi piso'i
>narselcru kansa joi trixe pe'a .i bau lo na'e rarna le jai pi se smadi cu
>mutce je selsanji zmadu .i roroi nu tolmifrygau joke gunma remna vau
>.eise'ijese'inai .i le smadi rango cu vlipa

coi maikl
i ie drani i le nalrarbau le rarbau cu zmadu le ka bau ce'u
pixokau nu sanji smadi cu sarcu le nunjmi kei ki'u le nu
le nalrarbau cu claxu piso'i kulnu tcaci i li'a le nu smadi
cu vajni pagbu le nu bangu i ku'i mi stali le nu jinvi le du'u
roda ka'e se skicu bau i pe'i lu lo bau na ka'e se skicu li'u
cu seznatfe i ri nalprane je nalmulno jeku'i stidi ve skicu

 >ni'o lu lo bangu po'o munje li'u rinka lenu mi pensi la borxes. e leri
>lisri be le se facki je se finti be zi'o be'o ke mujyskicu ckupoi .i
>li'anai la lojban. cu simsa

i li'asai la lojban cu simsa i roda poi zvati le me la borxes
ckupoi cu ka'e se fanva fi la lojban vau zo'ozo'onai i ji'a
ro le xe fanva cu cmima le ckupoi i ei ma'a facki lei xagrai

> i lu le brife ri'a le nalci pelo lobzgi li'u tcita di'e .tu'e
>
> puki filei la jbotur.
> cmana pu co'anai tavla
> .i go'i fileri ctino co
> carmyzirpu .i go'i
> fi lei danlu sutra
> .e lei spati masno
>
> .i go'i file tsani co skari
> befo noda poi na'e
> vizyzva .i go'i fi
> lei kobli .e lei pamei
> cedlidni .e lei sorgu
> .e lei pijlarkemcajzu'e
>
> .i go'i fi lei to'e morji ja
> no'e morji ja morji be le mijyjbo
> .i go'i fi lei pemcrxaiku.
> .e lei pemcrdrotkueit.
> e lei valsi morna .e lei
> pemci be da poi pu'o
>
> cusku kai la jbotur.
> i go'i filei tarci
> .e lei tarkemnimcevni
> .i go'i fi lei mu'e desku
> tumla kei .e lei toldi
> poi jmive ti'u le cimni
>
> .i di'u zo'u ni'inai ri ku
> fi lei xamsi cu tavla pu'o
>
>tu'u .uonairu'e

i puktce i ta'o xu zo cedlidni cu basti zo cedrylidne
i ru'a do na skicu lo lindi be lo cerda i le selkecti
cerda ze'i zanlifri le ri selcerda

>ni'o pemci melbi .i mu'asai lu cinfo skari rirxe sa'a li'u vau

i ri na'ebomi pamoi se finti i ri noi xe skicu le rirxe po'u
la delyplatas cu slabu ke pemci tanru i mi gleki le nu
do nelci

i lu co'a je co'u sance li'u di'e tcita i tu'e

i mi morji le nu
ca le fanmo be lo donri
ca le krasi be le mi'o cuntu
mi'o cadzu lo ganra klaji pa'o
lei prenu i do sanga
loi badri rimni gi'e bacru
loi prami jufra i caku
mi do ba'o kansa i ai
le do selsku cu murta
lei do se cinmo loi valsi
ca le krasi be lo donri
ca le fanmo be le mi'o cuntu


tu'u
co'o mi'e xorxes