X-Digest-Num: 153 Message-ID: <44114.153.913.959273824@eGroups.com> Date: Mon, 31 May 1999 10:09:02 -0300 From: "=?iso-8859-1?Q?Jorge_J._Llamb=EDas?=" Subject: ckafybarja lisri X-Yahoo-Message-Num: 913 Content-Length: 1458 Lines: 36 i lu coi fi'i doi pendo do mi'a ze'u na vitke le ckafybarja li'u se tirna mi ca le nu nerkla i lu do mo ze'a le purlamji li'u i lu e'o bevri lo ladyckafi ku joi loi lurba'otai i mi ba'onai citka le pamoi cidja gi'eseri'abo xagji i e'u mi do ba tavla ze'a le nu citka i e'o sutra li'u se spusku mi le rinsa je terpreti no'u le barjyku'i i by mi slabu pendo i semu'ibo by na se fanza le nu mi milxe tolclite i by roroi xendo i ni'o mi naldasygau mi le kosta gi'e punji ky le trixe be le stizu gi'e zutse i ze'a le nu denpa kei mi sruri catlu i tolmutce le ka ba'o cenba i lei bitmu za'o tengu murse i lei misno partci ze'e kruca dandu i lei se barja cu so'umoi ca le clira tcika gi'e se flira co za'orsipna simlu i oi ma rinka le nu by na klama i ni'o lu lei do lurba'otai cu kukte doi dirba barjyku'i i ja'a kuktce tai le se morji be mi li'u ibabo mi tolylaugau le mi voksa gi'e cusku lu mi pu zvati le drata kevna li'u i by se spaji i lu je'upei li'u i mi ra'isku lu mi co'a crebi'o le drata bangu i ji'a mi pu tavla la sacydonsu bau dyby li'u i lu sacydonsu ki'a li'u i lu datbau valsi i dunli zo cfadunda le ka smuni i cmene le finti be le bangu li'u i lu cizra lujvo li'u i ni'o lu ua mi pu ca'o tolmorji i mi ji'a te nuzba fo do li'u se cusku by ca le nu mi mo'u pinxe le romoi ckafyspi i lu ko smadi le du'u makau puzi spebi'o li'u i by denpa le nu mi spuda kei nagi'e gekyki'a lu le zirpu terpemci li'u co'o mi'e xorxes