To: lojban@yahoogroups.com
Bcc: 
Subject: Le Petit Prince - XIV
Date: Thu, 03 Oct 2002 22:16:45 +0000
Mime-Version: 1.0
Content-Type: text/plain; format=flowed
Message-ID: <F199h79j28pYSopah9U0000e41b@hotmail.com>
From: "Jorge Llambias" <jjllambias@hotmail.com>
Content-Length: 3855
Lines: 120


ni'o le mumoi plini cu mutce le ka cizra i py cmalu traji fo le
romei i le canlu cu satci banzu le nu canlu le garna terlumci kujoi
le terlumci cikygau i le cmalu noltrube'a na snada le nu jimpe le
du'u makau prali bu'u lo pagbu be le kensa re'o lo plini noi claxu
lo'e zdani e lo'e se xabju ku'o fi lo'e garna terlumci e lo'e
terlumci cikygau i ku'i ny fi ny cusku fe di'e

ni'o lu ju'ocu'i le va nanmu cu tolracli i ku'i ta mleca le
tolraitru e le sezyjgidu'e e le cu'upre e le pixydu'e le ka
tolracli i le jibri be ta do'anai cu se smuni i le nu ta cikygau
le terlumci cu panra lo'e nu jbegau lo cnino tarci a lo xrula i le
nu ta cadgau le terlumci cu sipri'a le tarci a le xrula i le jibri
cu melbi i jy te prali je'u ki'u le nu jy melbi li'u

ni'o ca le nu ny tolcliva le plini cu sinma rinsa le cikygau

-- i coi do'u i ki'u ma do puzi cadgau le do terlumci

-- i le javni --sei le cikygau cu spusku-- i ko cerni zanli'i

-- i ma se javni

-- i le nu cadgau le mi terlumci i ko vanci zanli'i

ni'o cy za'ure'u cikygau ty

-- i ku'i ki'u ma do puzi za'ure'u cikygau ta

-- i le javni --sei le cikygau cu spusku

-- i mi na jimpe --sei le cmalu noltrube'a cu cusku

-- i einai jimpe da --sei le cikygau cu cusku-- i le javni cu javni
i ko cerni zanli'i

ni'o cy cadgau le cy terlumci

ni'o baku cy sudgau le mebri sepi'o lo xunre kurfa boxfo

-- i mi gunka lo malnandu i puzu racli i mi pu cadgau ca lo'e cerni
gi'e cikygau ca lo'e vanci i mi surla ze'a lo'e donri velvi'u gi'e
sipna ze'a lo'e nicte velvi'u

-- i xu ba la'e di'u le javni ba'o cenba

-- i le javni na cenba --sei le cikygau cu cusku-- i la'e di'u sa'e
nabmi i le plini ca'o lei nanca cu zenba le ka sutra fa le nu carna
ije le javni na cenba

-- i ni'i mo --sei le cmalu noltrube'a cu cusku

-- i ni'iku caku py mulcarna paroi ro mentu ije mi claxu lo'e nu
surla poi snidu be li pa ji'asai i mi cikygau gi'e cadgau paroi
ro mentu

-- i u'i lo'e djedi cu mentu bu'u le medomoi

-- i u'inaisai --sei le cikygau cu cusku-- i mi'o ba'o tavla simxu
ze'a lo masti

-- i xu lo masti

-- i go'i i lo mentu be li cino i va'i lo djedi be li cino i ko
vanci zanli'i

ni'o cy boi za'ure'u cikygau le cy terlumci

ni'o le cmalu noltrube'a cu catlu gi'e nelci le cikygau noi tai
bigysi'a le javni i ny morji fi lei solri nu canci noi ny pu ta'e
sisku ta'i le nu bevri le ny stizu i ny djica le nu sidju le ny
pendo

-- i e'u i mi se slabu lo tadji be le nu do surla ca le nu do djica

-- i mi roroi djica --sei le cikygau cu cusku

ni'o je'u zu'i ka'e bigysi'a je lacri

ni'o le cmalu noltrube'a di'a cusku

-- i le do plini tai cmalu ja'e le nu do ka'e sruri py fau ci nu
stapa i le nu do masno cadzu cu banzu le nu do ze'e stali le solri
mlana i do ca le nu do djica le nu surla cu cadzu i le donri ba
ranji le do se djica

-- i prali mi la'e di'u fa na'ebo lo mutce --sei le cikygau cu
cusku-- i le pukrai be mi cu nu sipna

-- i na zanfunca --sei le cmalu noltrube'a cu cusku

-- i na zanfunca --sei le cikygau cu cusku-- i ko cerni zanli'i

ni'o cy cadgau le cy terlumci

ni'o lu ta --sei le cmalu noltrube'a fi vo'a ca le nu ca'o litru
cu cusku-- ta so'emu'ei se tolsinma ro le drata no'u le nolraitru e
le sezyjgidu'e e le pixydu'e e le cu'upre i ku'i ta se steci le ka
na simlu fi mi fe le ka se ckasu kakne i ju'ocu'i la'e di'u se mukti
le nu ta se cuntu tu'a lo na'e sevzi be vo'a li'u

ni'o ny cnivasxu gi'e di'a cusku di'e fi cy

ni'o lu ta se steci le ka mi ka'e pendo ce'u i ku'i le ta plini cu
dukse le ka cmalu i claxu lo'e danlu be lo'e remei li'u

ni'o le cmalu noltrube'a na darsi le nu ny juncru ny le du'u ny
xenru tu'a le vi plini mu'i lei paki'ovovono solri nu canci pe ro
cacra be li revo

------------

mu'o mi'e xorxes


_________________________________________________________________
Send and receive Hotmail on your mobile device: http://mobile.msn.com