mi pu zi tcidu lo cinri prosa be lo smuni be zo kau bei la ilmen be'o bei la ilmen
https://mw.lojban.org/papri/UserWiki:Ilmen/lo_smuni_be_zo_kau
.i mi friti lo so'u pinka noi .a'o sidju lo nu za'o lanli
ni'o pa mai .e'u na dukse lo ka jundi zo djuno .i so'i roi ku lo ve ciksi noi mapti zo djuno cu na satci mapti lo drata selbri .i zo djuno zo'u lo se djuno cu jai sarcu fai lo ka jetnu .i ku'i mu'a pensi zo ji'isre .i li'a lu mi pu ji'isre lo du'u ma kau sipna li'u na selsmudu'i lu ro'oi da zo'u ga nai da sipna gi mi pu ji'isre lo du'u da sipna li'u .i matmau fa lo simsa be lu su'oi da zo'u ge mi pu jinvi lo du'u da sipna gi mi pu ji'isre lo du'u da sipna li'u .i si'a lu mi pu jdice lo du'u mi ba klama ma kau .i ku'i mi nau cenba lo ka te sidbo li'u na selsmudu'i lu ro'oi da zo'u ga nai mi ba klama da gi mi pu jdice lo du'u mi ba klama da .i li'o li'u .i matmau fa lo simsa be lu ro'oi da zo'u ga nai mi pu .aidji lo ka klama da gi mi pu jdice lo du'u mi ba klama da .i li'o li'u .i si'a lu mi birti lo du'u ma kau sipna li'u cu na selsmudu'i lu ro'oi da zo'u ga nai da sipna gi mi birti lo du'u da sipna li'u .i matmau fa lo simsa be lu ro'oi da zo'u ga nai mi krici lo du'u da sipna gi mi birti lo du'u da sipna li'u
.i lo danfu poi se sinxa lu ma kau li'u na ro roi jetnu ja fatci danfu .i dy danfu co mapti lo vanbi .i lo bauske prosa poi do sitna (to
http://paulegre.free.fr/Papers/usee.pdf toi) cu tavla fi la'e zoi gy veridical and non-veridical verbs gy
ni'o re mai zo kau pe ne'i lo ka zei jufra zo'u mi tugni fi lo du'u na satci mintu lo du'u zei kau .i ku'i pe'i la'e di'u jalge lo nu lo lojbo ke karbi selbri cu lafti selbri .i .e'u ma'a lanli lo drata tadji be lo nu pilno zo djuno
.i mi djuno lo du'u la djan cu citka ma kau
.i mi djuno lo du'u la .alis cu citka ma kau
.i mi djuno lo ka ce'u citka ma kau kei la djan
.i mi djuno lo ka ce'u citka ma kau kei la .alis
.i la djan cu frica la .alis lo ka ce'u citka ma kau
.i .i'a lu ma kau li'u cu simsa zo ce'u lo ka sinxa lo kunti ke sumti stuzi .i ku'i zo kau jarco lo du'u ma kau fancu ma kau .i lo re stuzi cu na dunsi'u .i lu mi do dunli lo ka ce'u ma kau nelci li'u na selsmudu'i lu mi do dunli lo ka ma kau ce'u nelci .i mutce frica
ni'o ci mai lo nu pilno zo kau lo ka jadni lo ralju bridi cu na se casnu .i mu'a lu .e'a do zukte ma kau li'u .a lu .ai mi ba pinxe lo sodva .a ma kau li'u
mu'o mi'e xorxes