[lojban] Le petit prince - I

["Jorge Llambias" <jjllambias@hotmail.com>]

ni'o Ca le nu mi nanca li xa kei mi paroi viska lo banli pixra ne lo
cukta be la cilce ricmei be'o noi se tcita lu se lifri lisri li'u i
pixra lo'e sincrboa noi tunlo lo danlu i di'e fukpi le pixra

                          <pixra>

ni'o fo le cukta cu cusku lu lo'e sincrboa cu tunlo le se kalte be sy
fau le nu ri mulno gi'enai se marxa ibabo sy na za'o kakne le nu muvdu
kei gi'e sipna ze'a le masti be li xa be'o poi te renvi le befru'e li'u

ni'o semu'ibo mi mutce pensi lo'e cicricmei se lifri gi'e baza snada le
nu sepi'o lo skari pinsi mi finti le mi pamoi pixra i le mi pixra pamoi
zo'u py simsa di'e

                          <pixra>

ni'o mi jarco le mi ralju se finti loi makcu prenu gi'e preti cusku fi
py fe le sedu'u xukau le mi pixra cu jai se terpa py

ni'o py spuda cusku fi mi fe lu ue lo mapku cu jai terpa da fai ma li'u

ni'o le mi se finti cu na pixra lo'e mapku i pixra lo'e sincrboa noi
ba'o tunlo lo xanto iseki'ubo mi pirci'a le nenri be le sincrboa mu'i
le nu lo'e makcu prenu ka'e jimpe i py roroi nitcu lo'e ve ciksi i le mi
pixra remoi cu simsa di'e

                          <pixra>

ni'o lei makcu prenu cu stidi fi mi fe le du'u mi cliva lei pixra be
lo'e sincrboa noi kalri ja ganlo ku'o gi'e co'a se cinri le tedyske e
le cirske e le cmaci e le genra isemu'ibo mi cliva ca le nu mi nanca li
xa kei lo ba banli jibri be lo'e pirlarpre i mi se tolxlu fo le nu
fliba fa le mi pixra pamoi e le mi pixra remoi i lo'e makcu prenu cu
noroi jimpe da zu'e py po'o ije tatpi fa lo'e verba le nu roroi ciksi

ni'o mi ki'u bilga le nu cuxna lo drata jibri ije mi cilre fi le nu
jatna lo'e vinji i mi vofli pisu'oroi ze'a piro le munje i le tedyske
ja'a sa'e mutce selfu mi i mi kakne le nu djuno ca le nu pare'u catlu
kei le du'u da du le jugygu'e jikau la arizonas i la'e di'u mutce se
pilno va'o le nu farcri ca le nicte

ni'o mi taiku ze'a le mi nunjmive cu so'iroi penmi so'i junri prenu i
mi ze'u xabju jbini loi makcu prenu i mi jibni mutce viska py i la'e
di'u na xagzenri'a le mi se jinvi

ni'o ca le nu mi penmi paboi py poi ke'a simlu fi mi fe le ka milxe
prije ku'o kei gau mi cipra fi py fa tu'a le mi pixra pamoi noi mi ru'i
ponse i mi djica le nu djuno le du'u xukau py ca'a jimpe kakne i ku'i
roroi py spuda cusku lu ta mapku li'u iseku'ibo mi py tavla genai lo'e
sincrboa gigenai lo'e cilce ricmei ginai lo'e tarci i mi mi punji le se
kuspe be py i mi py tavla lo'e nu kelcrbridji e lo'e nu kelcrgolfi e
lo'e jecta srana e lo'e nebysrijge i le makcu prenu cu mutce gleki le
nu se slabu lo tai racli nanmu

----------

mu'o mi'e xorxes


_________________________________________________________________
Join the world’s largest e-mail service with MSN Hotmail. 
http://www.hotmail.com


------------------------ Yahoo! Groups Sponsor ---------------------~-->
4 DVDs Free +s&p Join Now
http://us.click.yahoo.com/pt6YBB/NXiEAA/MVfIAA/GSaulB/TM
---------------------------------------------------------------------~->

To unsubscribe, send mail to lojban-unsubscribe@onelist.com 

Your use of Yahoo! Groups is subject to http://docs.yahoo.com/info/terms/