[lojban] Le petit prince - V

["Jorge Llambias" <jjllambias@hotmail.com>]

ni'o ca ro donri mi cilre da le plini a le nu cliva a le nu litru
i la'e di'u masno fasnu fau le nu cunso pensi i taiku ca le cimoi
donri mi djuno fi le betri pe lei tricrbaobabu

ni'o ca le ca krefu ji'a za'ure'u fasnu seja'e le lanpanzi iki'ubo
le cmalu noltrube'a cu suksa retsku di'e mi tai le nu junri senpi

-- i je'usaipei lo'e lanpanzi cu citka lo'e dzispa

-- i go'i je'u

-- i o'u mi gleki

ni'o mi na jimpe le du'u ki'u makau tai vajni fa le nu lo'e lanpanzi
cu citka lo'e dzispa i ku'i le cmalu noltrube'a cu jmina cusku

-- iseni'ibo xu ly citka lo'e tricrbaobabu ji'a

ni'o mi fa'irgau le cmalu noltrube'a le du'u lo'e tricrbaobabu genai
dzispa giku'i tricu co barda tai lo'e malsi kei e le du'u va'oji'asai
le nu da'i ny bevri piro lo xanto so'imei kei le so'imei na mo'u co'e
su'opaji'asai tricrbaobabu

ni'o le sidbo be lo'e xanto so'imei cu cmilygau le cmalu noltrube'a

-- i da'i ei cpanygau su'oboi xy boi su'o boi xy

i ku'i ny prije cusku di'e

-- i lo'e tricrbaobabu zo'u pu le nu banro kei ty cfari fau le nu cmalu

-- i drani i ku'i mu'i ma do djica le nu le do lanpanzi cu citka le
cmalu tricrbaobabu

i ny mi spuda lu ie li'a li'u tai le nu frili se jimpe i mi nitcu
lo nandu ke mensi nuntoi le nu mi nonkansa jimpe fi le nabmi

ni'o je'u zvati le terdi be le cmalu noltrube'a tai le nu zvati ro terdi kei 
fa loi xamgu srasu e loi xlali srasu i seni'ibo go'i fa
lo xamgu tsiju be lo xamgu srasu be'o e lo xlali tsiju be lo xlali
srasu i ku'i lo'e tsiju na ka'e se viska i ty sipna ne'i le se mipri
be le terdi co'u le nu sidbo fi pa boi ty fa le nu ty cikna binxo
ibabo ty preja gi'e catke fau le nu toldarsi ca le cfari kei fa'a
le solri lo cmalu ke tolckape jicycma i va'o le nu jicycma lo'e
samcu a lo'e rozgu kei ty catke e'a tai lo'e pluka be ty i ku'i va'o
le nu xlali spati kei zu'i vimcu ei le spati co'a le nu zu'i facki
fi sy i ju'a loi xlali mutce tsiju cu zvati le terdi be le cmalu
noltrube'a i tsiju lo'e tricrbaobabu i le loldi be le terdi cu culno
ty i ju'a lo'e tricrbaobabu zo'u va'o le nu zu'i lerci dukse facki
fi ty kei zu'i ze'eba na kakne le nu vimcu ty i ty se canlu piro le
terdi i ty gregau le genja le terdi i va'o le nu ge le terdi cu dukse
le ka cmalu gi lei tricrbaobabu cu dukse le ka se kancu fi makau cu
spoja fa le terdi gau ty

ni'o lu srana le nu cnici sei le cmalu noltrube'a fi mi ba cusku i
ba lo'e nu zu'i mu'o lumci vo'a ca le cerni kei zu'i kurji lumci ei
le terdi i ei zu'i bilgygau vo'a le nu di'i vimcu lo'e tricrbaobabu
co'a le nu tolcri ty kei le midju be loi rozgu noi ty mutce simsa
ke'a ca le nu mutce tolci'o i le nu gunka cu mutce tolzdi gi'eku'i
mutce frili li'u

ni'o ca lo donri ny stidi fi mi fe le du'u mi troci le nu finti lo
melbi pixra kei tezu'e le nu gasnu le nu mulno jimpe la'e di'u fa
lei verba pe le mi terdi i lu va'o le nu vy litru ca da kei sei ny
cusku la'e di'u ka'e xamgu vy i su'oroi na raktu fa le nu balpunji
le nu gunka i ku'i va'u le nu srana lo'e tricrbaobabu kei roroi
raktu mutce i mi se slabu lo plini poi se xabju lo lazni i ly
naljunri ci dzispa li'u

ni'o fi'o gidva le cmalu noltrube'a mi pirfi'i le di'u plini i mi
nasai nelci le nu mi marde cusku i ku'i le ckape pe lo'e tricrbaobabu
cu tai tolmutce te djuno ijebo lei se tolnu'a be lo'e farcri be bu'u
lo'e plinycma cu tai vajni isemu'ibo paroiku mi na'e tarti le nu mi
jinzi sezyfanta i mi cusku lu doi verba ko jundi lo'e tricrbaobabu
li'u i mi kajde lei mi pendo lo ckape poi py ne pa'a mi ze'upu
lamji ke'a secau le nu sanji isezu'ebo mi tai mutce gunka tu'a le
vi pixra i le te ctuca be fi mi cu vamji le nu troci i ju'ocu'i do
retsku fi do fe le sedu'u ki'umakau na zvati le dei cukta fa lo
drata pixra poi dunli le pixra be lo'e tricrbaobabu le ka banli i
le danfu cu sampu mutce i mi troci gi'eku'i na snada i ca le nu mi
pirfi'i lei tricrbaobabu kei mi se bapli le se cinmo pe le nu vaitcu

-----------

mu'o mi'e xorxes





_________________________________________________________________
MSN Photos is the easiest way to share and print your photos: 
http://photos.msn.com/support/worldwide.aspx


------------------------ Yahoo! Groups Sponsor ---------------------~-->
4 DVDs Free +s&p Join Now
http://us.click.yahoo.com/pt6YBB/NXiEAA/MVfIAA/GSaulB/TM
---------------------------------------------------------------------~->

To unsubscribe, send mail to lojban-unsubscribe@onelist.com 

Your use of Yahoo! Groups is subject to http://docs.yahoo.com/info/terms/