[lojban] Le Petit Prince - VIII

["Jorge Llambias" <jjllambias@hotmail.com>]

ni'o mi ze'i cilre fi le nu djuno fi le bi'unai xrula i ze'epu
ta'e zvati le terdi be le cmalu noltrube'a fa lo'e sampu mutce
xrula noi se jadni papo'o djine be lo'e rulpezli zi'e noi ja'a
ru'e se canlo zi'e noi fanza noda i xy tolcanci ca le cerni le
srasu ibabo xy canci ca le vanci i ku'i le bi'unai xrula co'a
te tsiju ca lo djedi fi da poi se bevri fo lo na te djuno i le
cmalu noltrube'a cu jibni jundi le stanycma noi na simsa lei
drata stanycma i cumki fa le nu cnino klesi lo'e tricrbaobabu
i ku'i le dzispa bazi sisti le nu banro kei gi'e co'a zbasu lo
xrula i le cmalu noltrube'a noi zvati le nu zvagau lo barda
balji cu birti le du'u ba barkla by fa lo se manci tolcanci i
ku'i le xrula za'o na mo'u brebi'o le nu melbi kei fi'o marbi
le xy crino kumfa i xy jundi cuxna le xy skari i xy masno le
nu dasni binxo i xy stika ro le rulpezli i xy na djica le nu
barkla fau le nu xy mulno se cinje tai tu'a lo'e xrulrpapavera
i xy na djica le nu tolcanci fau na'ebo le mulno nu dirce le
nu xy melbi i ie xy mutce le ka melsanji i le se mipri nu xy
brebi'o cu djedi li so'o gi'ebabo djedi li so'i ibabo ca lo
cerni ca le tcika be le solri nu tolcanci kei xy jarco vo'a

ni'o xy noi pu tai tcila gunka cu cusku di'e fau le nu sipna
frumu

-- i a'i mi ja'aru'e co'a cikna i ko mi fraxu i u'u mi za'o
mulno krekalsa

ni'o le cmalu noltrube'a ka'enai rivbi le nu manci

-- i u'e do melbi

-- i go'i pei --sei le xrula cu xutla spusku-- i mi dunli le
solri le ka jbena ca makau

ni'o le cmalu noltrube'a cu drani smadi le du'u xy na mutce le
ka cumlo i ku'i xy tai cnigau

-- i pe'i tcika tu'a le cerni sanmi --sei xy bazi jmina cusku--
i da'i do mi xendo le nu pensi mi

ni'o le cmalu noltrube'a fau le nu mulno se cfipu kei ca le nu
ba'o tolcri lo jaursabytcu cu vifne djacu selfu le xrula

ni'o taiku xy fanza ny fau le nu xy badri milxe jgira i mu'a
ca lo donri fau le nu tavla fi le vo kinli po'e xy kei xy
cusku di'e le cmalu noltrube'a

-- i ka'e klama fa lo'e tirxu noi se jgalu

-- i no tirxu cu zvati le mi terdi --sei le cmalu noltrube'a
cu fapro cusku-- i ji'a lo'e tirxu na citka lo'e srasu

-- i mi na srasu --sei le xrula cu xutla spusku

-- i ko mi fraxu

-- i mi na terpa lo'e tirxu i ku'i mi mutce terpa lo'e vacri
brife i xu do ponse lo bifmarbi

ni'o lu mutce terpa lo'e vacri brife i na zabna funca lo'e
spati --sei le cmalu noltrube'a cu zgana-- i le vi xrula cu
mutce pluja li'u

-- i ca ro vanci do mi setca lo blacygai i mutce lenku bu'u le
medomoi i xlali stuzi i bu'u le te klama be fi mi y

ni'o ku'i xy dicra vo'a i xy pu klama fau le nu tsiju i xy
ka'enai pu se slabu lo'e drata terdi i xy fau le nu ckeji le
nu curmi le nu da facki fi le nu xy bregau lo tai klina jitfa
cu reji'iciroi kafke tezu'e le nu le cmalu noltrube'a cu zungi

-- i xu le bifmarbi

-- i mi pu'o klama tezu'e le nu tolcri  i ku'i do mi tavla

ni'o xy bapli le nu kafke kei tezu'e le nu frigau ny lo'e
zugyselcni

ni'o taiku le cmalu noltrube'a mu'inai le zabna terzu'e pe le
ny nunprami bazi tolylacri xy i ny junri jundi loi na'e vajni
valsi gi'e binxo lo mutce tolgei

ni'o lu ei mi pu na'e tirna xy --sei ny fi mi ca lo djedi cu
lacri cusku-- i ei zu'i noroi tirna lo'e xrula i ei zu'i xy
catlu gi'e sumne i le memimoi cu clugau le mi terdi loi titla
panci i ku'i mi pu na se pluka i le lisri be lo'e jgalu be'o
noi tai fanza mi cu ei mi cnigau li'u

ni'o ny za'o lacri cusku lu mi pu na kakne le nu jimpe fi da i
ei mi pajni ji'u loi se zukte enai loi valsi i iu xy mi panci
clugau gi'e te gusni i u'u eisai mi na cliva i ei mi smadi fi
le nu xy xendo poi se mipri fo le nu xy tcica i oi lo'e xrula
cu tai natfe tarti i ku'i mi dukse le ka citno kei le nu djuno
kakne le nu prami xy



_________________________________________________________________
MSN Photos is the easiest way to share and print your photos: 
http://photos.msn.com/support/worldwide.aspx


------------------------ Yahoo! Groups Sponsor ---------------------~-->
Sell a Home with Ease!
http://us.click.yahoo.com/SrPZMC/kTmEAA/MVfIAA/GSaulB/TM
---------------------------------------------------------------------~->

To unsubscribe, send mail to lojban-unsubscribe@onelist.com 

Your use of Yahoo! Groups is subject to http://docs.yahoo.com/info/terms/