[lojban] Le Petit Prince - XI

["Jorge Llambias" <jjllambias@hotmail.com>]

ni'o le remoi plini cu se xabju lo sezyjgidu'e

-- i a'e lo sinma be mi mi vitke --sei le sezyjgidu'e ca le nu
co'a viska le cmalu noltrube'a cu vu krixa cusku

ni'oki'ubo ga'a lo'e sezyjgidu'e ro drata remna cu sinma sy

-- i coi do'u --sei le cmalu noltrube'a cu cusku-- i do dasni lo
cizra mapku

-- i ti tutci lo'e nu mi rinsa --sei le sezyjgidu'e cu spusku-- i
ti tutci lo'e nu mi rinsa ca le nu mi se ki'azau i ku'i uinai
noroiku da vi litru

-- i a'a sei le cmalu noltrube'a noi na jimpe cu cusku

-- i ko jalsimgau lei do xance --sei le sezyjgidu'e cu stidi

ni'o le cmalu noltrube'a cu jalsimgau lei xance i le sezyjgidu'e
cu cunlo rinsa fau le nu lafti le mapku

ni'o lu ta zdimau le nu vitke le nolraitru li'u se sezysku le cmalu
noltrube'a i ny di'a ca'o jalsimgau lei xance i le sezyjgidu'e di'a
rinsa fau le nu lafti le mapku

ni'o baza lo mentu be li mu be'o noi nu zajba cu tatpi fa le cmalu
noltrube'a le stodi nu kelci

-- i pau le nu le mapku cu farlu --sei ny preti cusku-- cu se sarcu ma

ni'o ku'i le sezyjgidu'e na tirna i lo'e sezyjgidu'e noroi tirna
na'ebo lo'e si'avla

-- i xu do mi ja'asai mutce sinma --sei sy fi le cmalu noltrube'a cu
preti cusku

-- i ma smuni le du'u sinma

-- i le du'u sinma cu se smuni le du'u zgana le nu mi traji le ka
melbi e le ka taxfu mapti e le ka ricfu mutce e le ka tolbebna fo
le se terdi

-- i ku'i ue do nonkansa le nu se terdi

-- i e'osai ko mi sinma va'o makau

-- i mi do sinma --sei le cmalu noltrube'a fau le nu milxe lafti
lei janco cu cusku-- i ku'i ma prali do la'e di'u

ni'o le cmalu noltrube'a cu cliva

ni'o lu lo'e makcu prenu ja'a cizra mutce li'u se cusku le cmalu
noltrube'a ri ze'a le nu litru




_________________________________________________________________
Chat with friends online, try MSN Messenger: http://messenger.msn.com


------------------------ Yahoo! Groups Sponsor ---------------------~-->
Home Selling? Try Us!
http://us.click.yahoo.com/QrPZMC/iTmEAA/ySSFAA/GSaulB/TM
---------------------------------------------------------------------~->

To unsubscribe, send mail to lojban-unsubscribe@onelist.com 

Your use of Yahoo! Groups is subject to http://docs.yahoo.com/info/terms/