[lojban] Le Petit Prince - XIII

["Jorge Llambias" <jjllambias@hotmail.com>]

ni'o le vomoi plini cu terdi le cu'upre i le nanmu cu tai ca'o
gunka ja'e ji'asai le nu ri na lafti le stedu ca le nu le cmalu
noltrube'a cu tolcliva

-- i coi do'u --sei ny fi cy cusku-- i le do sigja ba'o naljelbi'o

-- i li ci li re te sumji li mu i li mu li ze li pare i li pare
li ci li pamu i coi do'u i li pamu li ze li rere i li rere li xa
li rebi i claxu lo'e temci pe le nu za'ure'u jelgau i li rexa li mu
li cipa i uo sumji fa li munopaki'o xarereki'o zecipa

-- i munonoki'oki'o mo

-- i ua xu do za'o zvati i munopaki'oki'o y i mi na za'o djuno i ei
mi gunka lo tai mutce i mi junri i mi na se zdile loi xalbo i li re
li mu li ze i y

-- i munonoki'oki'o mo --sei le cmalu noltrube'a noi noroi le nu
jmive cu sisti tu'a lo preti ca le nu ba'o cusku py cu za'ure'u cusku

ni'o le cu'upre cu lafti le stedu

-- i ze'a le nanca be li muvo be'o poi ze'a ke'a mi xabju le bu'u
plini ku'o mi cipo'oroi se dicra i le pamoi cu fasnu puza le nanca
be li rere gau le bicybra noi ke'a farlu fi makau du'o le cevni ku
po'o i by se sance le rigni savru ibo mi voroi srera le nu sumji
kanji i le remoi cu fasnu puza le nanca be li papa ri'a le nu mi
sluji bilma i mi pime'irauroi zajba i mi claxu le temci pe le nu
cunso cadzu i mi junri i le cimoi y cu fasnu caku i no'i li
munopaki'o y

-- i munonoki'oki'o mo

ni'o le cu'upre cu jimpe le du'u li no te pacna le nu smaji

-- i munonoki'oki'o cmalu dacti poi su'oroi se viska fi le tsani

-- i xu lo'e sfani

-- i na go'i i lo'e cmalu dacti poi carmi

-- i xu lo'e bifce

-- i na go'i i lo'e cmalu ke sloskari dacti poi gasnu le nu lo'e
tolgunka cu ciksenva i ku'i mi junri i mi claxu lo'e temci pe le
nu ciksenva

-- i ua xu lo'e tarci

-- i drani i lo'e tarci

-- i do mo munonoki'oki'o tarci

-- i munopaki'o xarereki'o zecipa tarci i mi junri i mi satci cusku

-- i do mo lei tarci

-- i ke'upei mi mo ty

-- i go'i

-- i sa'u mi ty ponse

-- i xu do ponse lei tarci

-- i go'i

-- i ku'i mi pu zgana le nolraitru noi ...

-- i lo'e nolraitru cu ponse nagi'e turni i mutce frica

-- i ma do prali le nu do ponse lei tarci

-- i prali mi fa le nu mi ricfu

-- i ma do prali le nu do ricfu

-- i le nu mi te vecnu loi drata tarci va'o le nu da tolcri ty

ni'o lu ta --sei le cmalu noltrube'a fi ri cusku-- milxe simsa
le mi pixydu'e le ka ce'u pensi ta'i makau li'u

ni'o ku'i ny za'o preti cusku

-- i zu'i ka'e ponse lei tarci ma

-- i ma ponse ty --sei le cu'upre fau le nu fengu cu spusku

-- i mi na djuno i noda go'e

-- i seki'ubo mi ponse ty le nu mi pamoi lei pensi be la'e di'u

-- i xu la'e di'u banzu

-- i li'a go'i i va'o lo'e nu do tolcri lo tabykrili poi noda ke'a
ponse zo'u do ty ponse i va'o lo'e nu do stufa'i lo daplu poi noda
ke'a ponse zo'u do dy ponse i va'o lo'e nu do pamoi lei te sidbo be
fi da gi'e rejgau zo'u do ponse da i mi ponse lei tarci le nu no
prenu pu tu'a mi cu pacna le nu ponse ty

-- i la'e di'u jetnu --sei le cmalu noltrube'a cu cusku-- i do ty mo

-- i mi ty jitro i mi ty kancu gi'e za'ure'u kancu --sei le cu'upre
cu cusku-- i nandu i ku'i mi junri

ni'o le cmalu noltrube'a za'o na se mansa

-- i va'o lo'e nu mi ponse lo nebyta'u zo'u mi kakne le nu mi ny
punji le sruri be le cnebo gi'e dasni i va'o lo'e nu mi ponse lo
xrula zo'u mi kakne le nu mi xy crepu gi'e bevri i ku'i do na kakne
le nu do crepu lei tarci

-- i na go'i i ku'i mi kakne le nu gau mi sorcu ty le banxa

-- i ma smuni la'e di'u

-- i smuni fa le du'u ge mi ciska le te kancu be lei tarci le cmalu
pelji gibabo mi setca le pelji le se stela dacru

-- i xu mulno

-- i banzu

ni'o lu zdile --sei le cmalu noltrube'a cu pensi-- i pemci tarti i
ku'i na junri mutce li'u

ni'o le cmalu noltrube'a cu mutce frica lo'e makcu prenu le ka
makau sidbo lo'e se junri ce'u

-- i mi --sei ny di'a cusku-- ponse le xrula noi mi jaursabji ke'a
ca ro djedi i mi ponse le ci je'erma'a noi mi derlumci ke'a ca ro
jeftu i mi derlumci le paboi jy poi cando ku'o ji'a i zu'i noroi
djuno i prali le mi je'erma'a e le mi xrula le nu mi ponse i ku'i
na prali lei tarci tu'a do

ni'o le cu'upre cu kargau le moklu gi'eku'i pensi noda poi spusku
ke'a i le cmalu noltrube'a cu cliva

ni'o lu lo'e makcu prenu ja'asai tolfadni mutce li'u se cusku le
cmalu noltrube'a ri ca le nu litru

----------------------------

mu'o mi'e xorxes


_________________________________________________________________
Send and receive Hotmail on your mobile device: http://mobile.msn.com


------------------------ Yahoo! Groups Sponsor ---------------------~-->
4 DVDs Free +s&p Join Now
http://us.click.yahoo.com/pt6YBB/NXiEAA/MVfIAA/GSaulB/TM
---------------------------------------------------------------------~->

To unsubscribe, send mail to lojban-unsubscribe@onelist.com 

Your use of Yahoo! Groups is subject to http://docs.yahoo.com/info/terms/