Re: xa'unro'axire

["Jorge J. Llambías" <jorge@xxxxxxxxxx.xxx.xxx]

coi maikl

i mi ca'o mutce nelci lei do lisycma i do finti bau lo zabna lojbo
i ni'o a'a zo xa'unro'axire lu xa'unro'a xire li'u na mintu le ka 
smuni i le pamoi cu valsi pamei gi'e fu'ivla i le remoi cu valsi 
cimei i ni'o ji'a mi te pinka lo do clani jufra di'e 

>.i canlu simxu fa mi .e ko'a goi lemi bavyspe .e ko'e goi 
>ke le ko'a mensi .e le nartunba bruna ke'e .e ko'i 
>goi le ko'e tixni noi nanca li vo ku'o .e le ko'i gerku noi 
>nanca li pa 

i pamai do nitcu le nu pilno zo ge'u i secau zo ge'u ko'a
du le do bavyspe e ko'e i ko'e du le ko'a mensi e le 
nartunba bruna e ko'i i ko'i du le ko'e tixni e le ko'i gerku
i zo ke joi zo ke'e na sidju i ta'o zo spebu'a cu valsi le bruna 
be le speni i zo me'ispe cu valsi le speni be le mensi 

i remai lu mi e ko'a canlu simxu li'u smuni mintu lu mi
canlu simxu ije ko'a canlu simxu li'u i pe'i do skudji lu
mi joi ko'a joi lei drata cu canlu simxu li'u

co'o mi'e xorxes