ckafybarja lisri

["Jorge J. Llambías" <jorge@xxxxxxxxxx.xxx.xxx]

i lu coi fi'i doi pendo do mi'a ze'u na vitke le ckafybarja li'u
se tirna mi ca le nu nerkla i lu do mo ze'a le purlamji li'u
i lu e'o bevri lo ladyckafi ku joi loi lurba'otai i mi ba'onai
citka le pamoi cidja gi'eseri'abo xagji i e'u mi do ba tavla 
ze'a le nu citka i e'o sutra li'u se spusku mi le rinsa je 
terpreti no'u le barjyku'i i by mi slabu pendo i semu'ibo
by na se fanza le nu mi milxe tolclite i by roroi xendo

i ni'o mi naldasygau mi le kosta gi'e punji ky le trixe 
be le stizu gi'e zutse i ze'a le nu denpa kei mi sruri catlu 
i tolmutce le ka ba'o cenba i lei bitmu za'o tengu murse
i lei misno partci ze'e kruca dandu i lei se barja cu 
so'umoi ca le clira tcika gi'e se flira co za'orsipna simlu
i oi ma rinka le nu by na klama

i ni'o lu lei do lurba'otai cu kukte doi dirba barjyku'i
i ja'a kuktce tai le se morji be mi li'u ibabo mi tolylaugau 
le mi voksa gi'e cusku lu mi pu zvati le drata kevna li'u
i by se spaji i lu je'upei li'u i mi ra'isku lu mi co'a crebi'o
le drata bangu i ji'a mi pu tavla la sacydonsu bau dyby 
li'u i lu sacydonsu ki'a li'u i lu datbau valsi i dunli zo 
cfadunda le ka smuni i cmene le finti be le bangu li'u
i lu cizra lujvo li'u 

i ni'o lu ua mi pu ca'o tolmorji i mi ji'a te nuzba fo do li'u 
se cusku by ca le nu mi mo'u pinxe le romoi ckafyspi
i lu ko smadi le du'u makau puzi spebi'o li'u i by denpa 
le nu mi spuda kei nagi'e gekyki'a lu le zirpu terpemci li'u

co'o mi'e xorxes