.uiri'ecai

[Spigot <spigot@xxxxxx.xxxx]

.uiri'ecai .i ko dansu lemi cilce pruxi .i mi cusku lu .ie.oi lenu do
dasni lei silka cu mukti lenu mi jinvi ledu'u mi ponse lei to'e mapti pagbu
.iku'i .iaru'e la'edi'u xagmau lenu mi badri cando li'u .i ganai mi
ponse roda poi mi djica ke'a gi le munje co'a grusi je lenku gi'e lemi
xandegji jipno co'a se katna le jinci .ija'ebo gu mi pante gi mi nelci lenu
mi piso'uroi ka'e cpacu lei grute .i doi la cevni ko dunda lepa grute mi ca
le nanca .i ko gasnu lenu mi klama ledo malsi .ije ko curve galfi mi va'o ledo
kukte tcica co kamfarvi .i .i'ore'ecai .i zo'o

.i lemi munje mo'iru'u sruri .i le sulbo'o cu marbi fi le sunbi'e be
le bertirai xamsi .iva'i fe'eba'o lei grana poi ragve lei festi tumla po'e
lei smaji menli ge'uku fe'eba'o lei lindi poi te pencu mi tai le ci'i cilta co
nejni foldi ku'oku mi cadzu lei broda tai lenu lei blaci ca'o porpi
.i .u'ore'ecai .i lei nixli cu djica lenu ri selzdi kei po'o .i mi na djica
lenu mi ze'u jmive .inaseja le djica cu na'e mapti .i mi na djica lenu mi dunda
lei tepsne .isa'u mi tcenei leka stace .isemu'ibo mi surla gi'e co'u xanka do
.i ko skicu ca lenu do farlu kei ca lenu do zgana lenu mi pu'o cadzu le kevna
.i rokci cpare lei cmana co makfa kamji'e .i le kamji'e cu selpo'e roda
.ije ma'a ka'e gasnu lenu ra dirce

.i mi pu tavla le ranmi je cevni krati lenu cfipu be mi bei fa lenu mi na'e
djuno ledu'u makau klesi leka prami ri'i mi .i ko'a cusku lu roda poi se sanji
do zo'u da xamgu li'u .i la'edi'u te damba mi .iku'i .ei.a'i mi sisti .ini'ibo
ko'a cevni vau zo'o .i mi za'o selsau lenu mi damba mi tai lenu mi dasni le
fukpi jenai krasi skapi .i mi na'eka'e jimpe fi lemi morna betai lei pluja
cinje .i lenu larcu ku jalge lenu siclu tu'i le tsani .i ca lenu mi krici
ledu'u mi facki fi lemi stuzi keikei mi suksa zgana leni mi zvasenpi .i
la'edi'u draselsfa .ini'ibo mi ta'e minde mi lenu mi zvali'a

.i tai le badri rorci bo troci co rutni mi na ponse lemi ro krasi jmadegji
.i mi seltai le selkei be lei remna .iva'i mi na'eka'e pavysei renvi
.i xu festi pau .i sei na'i .i .aipei mi kurji vau .eipei .i sei ju'onai
do na kurji .i ca lenu mi'a gleki bajra mo'izo'a lei solri bo darxi clani bo
tricu be fi'o jimca lei kuspe be le cambla tsani kukuku vi'a le mipri je
mlilenku ctino bo canlu be pa'u lei clika kei mi jinvi ledu'u roda drani
.ibabo ku'i mi morji ledu'u le munje cu sakci .i girzu leka natfe .ije'u
le munje cu sakci .iku'i sakci ji'a fa lenu xamgu molgle vauvau zo'o