le jungo namselkei (puzzle)

["Jorge Llambias" <jjllambias@xxxxxxx.xxxx]

i jungo namselkei i tolkargu je sampu selkei i simsa
lo'e daski junla le ka mitre i claxu ro spaji lujyca'a
i le plita mudri noi xunrybunre ba'o se sraku ja'e loi blanu
ke farvrici xanle noi ro ke'a pluta lo cmalu kevna i le bolci
noi si'a blanu cu se punji ei fi pa le xanle ebabo le kevna
tai le nu salpygau je deskygau le tanxe i ca le nu le bolci
cu nenri le kevna kei le nunkei cu mulno i le nu krefu cfari
cu sarcu le nu deskygau ja'e le nu le bolci cu bartu le kevna
i le dacti cu se gacri lo jdari blaci bolxadba i le namselkei
ka'e se punji fi le daski gi'e se bevri gi'e fe'eroroi se lebna
gi'e se kelci

i ze'a le nu le bolci na ca'o se pilno kei piso'eroiku
by fa'ajeto'o trixe jorne xance cadzu le plita gi'e rivbi
lei xanle i by jinvi le du'u by banzu se fanza lei xanle ze'a
le nu ca'o kelci kei gi'eseki'ubo zifre le nu surla bu'u
le kalri plita ca le nu no nunkei ca'o fasnu i so'uroiku
by galtu catlu le bolxadba blaci iku'i la'e di'u se rinka
le tcaci gi'enai se zukte fi le nu facki da le galtu
i by bajra fo lo preja gi'e xusra le du'u by na se matyzba
fi lei jarki xanle i di'u pagbu jetnu i ja'a lei xanle cu
tagji vasru by i ku'i ji'a jitfa i fatci fa le du'u le bolci
cu jundi se zbasu tezu'e le nu by satci mapti
le xanle remoi cimde i li'a na zukte fi le nu lei xanle
cu se kufra by i va'oda'i le nu ja'a go'i kei na namselkei

--------------------

i la'e di'u se finti la franz kafkas gi'e xe fanva fu mi
co'o mi'e xorxes