|
coi ro do
.i ta'o mi pu no roi cusku fo ti vau .o'u nai
ro'u .ii ro'u
ni'o ta'o nai .ai mi casnu zo ninmu joi zo
nanmu .i pe'i ri na banzu lo nu satci skicu lo prenu .i sa'e mu'a so'o prenu
cu no'e ninmu gi'e no'e nanmu .i je mu'a cu'i so'o prenu cu je'a ninmu
joi je'a nanmu .i mu'a nai sa'u da ka'e ge ninmu gi
nanmu
ni'o se ki'u bo mi stidi di'e .i lo ninmu ja nanmu
cu ninmu ja nanmu ba'e da poi selkai ge'u .i mu'a mi nanmu so'e da
gi'u ku'i ninmu lo ka clani kerfa ce'u .i ra'u mi nanmu .i ra'u nai mi ninmu
so'u da .i so'a prenu cu ninmu je nanmu
ni'o ta'o cinri fa lo du'u zo fetsi .e zo nakni
cu xamgu .i sa'e lo fetsi be lo remselda'u cu fetsi fi lo selkai .i na
fetsi fi zi'o .i pe'i zo ninmu ba'e zmadu lo ka nitcu lo selkai
tergi'u be fi ce'u .i pe'i ru'e lo fetsi cu fetsi fi zi'o .i ta'o mu'a xu mi
fetsi to mi nakni nanmu toi
ni'o ba'u ju'o cu'i zo ninmu .e zo
nanmu zo'u nitcu lo ci moi tergi'u poi srana lo simsa be lo se
melbi .a lo ve melbi .i mi na birti .i cumki fa lo nu nitcu lo simsa be ge lo se
melbi gi lo ve melbi .i mu'a to xlali mupli .u'u toi mi nanmu lo ka sampla kei
so'i da lo mi'o kulnu .i je ku'i lo sampla ba'e na nanmu fo so'i kulnu .i lo
nanmu cu tsali gi'e kalte .i ku'i li'a fo lo drata kulnu fa lo kalte cu
ninmu
ni'o ma se jinvi do
mu'o mi'e .daniel.brokman. no'u zo'oi daniel@brockman.se
|