lisri pagbu cimoi

["Jorge Llambias" <jjllambias@hotmail.com>]

i le ninmu cu cliva le stizu gi'e cadzu ca'ufa'a
le zgike minji i la pedrot ny catlu i ny mutce
le ka ninmu i py nelci le nu le ny tarmi cu satci
pagre le xekri silka i py joi ny cu pendysi'u co'a
le nu verba i py mleca ny le ka nanca kei li papimu
i ca le nu verba kei nupsi'u le nu speni ca le nu
makcu i ca le nu makcu kei tugnysi'u le nu naltinbe
le nunverba selnupre i ny setca lo sicni le minji
gi'e danre le batke be fi le nu cuxna lo selsanga
bei fo lo slasi i lo glamli je ranti sance cu se
tisna le barja i ny dansycadzu fa'a py gi'e cusku
lu ko vimcu le du'udri jvinu le flira doi pe mi
pedrot i mi na jimpe le du'u ki'u makau do na nelci
la melnak i xu do jilra li'u i lu ie mi jilrai
i mi traji le ka jilka i mi nitcu lo slami le nu
lanxe li'u py se spuda sepi'o lo betri voksa
i ny cismysku lu bebna li'u

to lo drata pagbu ba se lidne toi

co'o mi'e xorxes

________________________________________________________________________
Get Your Private, Free E-mail from MSN Hotmail at http://www.hotmail.com