[Date Prev][Date Next][Thread Prev][Thread Next][Date Index][Thread Index]
Le Petit Prince - VII
ni'o ca le mumoi donri fi'o za'ure'u se jalge le lanpanzi le
di'e se mipri pe le nunjmive pe le cmalu noltrube'a cu binxo
lo to'e se mipri be fi mi i ny suksa retsku di'e mi secau lo'e
pruselsku tai lo'e nu jalge lo nu ze'u smaji pensi lo nabmi
-- i lo'e lanpanzi zo'u pau tai le nu ly citka lo'e dzispa kei
ly citka lo'e xrula xu ji'a
-- i lo'e lanpanzi cu citka ro se penmi be ly
-- i xu go'i lo'e xrula ji'asai poi se pagbu lo kinli
-- i ja'a go'i lo'e xrula ji'asai poi se pagbu lo kinli
-- i va'oku lo'e kinli cu selfu fi ma
ni'o mi na djuno i mi mutce le ka gunka le nu troci le nu vimcu
lo klupe poi dukse tagji ku'o le mi matra i mi mutce le ka dunku
ki'u ge le nu le nu spofu cu co'a simlu le ka vajni gi le nu le
se pinxe djacu noi se xaksu cu gasnu le nu mi tepypa'a le xlarai
-- i lo'e kinli cu selfu fi ma
ni'o le cmalu noltrube'a noroi sisti tu'a lo preti ca le nu ny
ba'o cusku i mi se fanza le mi klupe gi'e spusku lo cunso
-- i lo'e kinli cu selfu fi noda i ky curve jalge le nu lo'e
xrula cu palci
-- i ue
ni'o ku'i ba lo nu smaji kei ny renro di'e mi fau le nu milxe
fengu
-- i ianai i lo'e xrula cu ralci i xy nalpalci i xy nurgau xy
ta'i lo'e se kakne i xy krici le du'u xy selteptce fau tu'a
lei xy kinli
ni'o mi spusku noda i ca le ca mokca mi fi mi cusku lu va'o le
nu le vi klupe za'o xarnu kei gau mi ky ba plipe sepi'o lo nu
mruli darxi li'u i le cmalu noltrube'a za'ure'u dicra le nu mi
pensi
-- i pau do jinvi fi lo'e xrula y
-- i na go'i i mi jinvi noda i mi pu spusku lo cunso i mi gunka
lo se junri cuntu
ni'o ny catlu mi fau le nu se spaji
-- i ua lo se junri cuntu
ni'o ny viska mi fau le nu le mruli cu zvati le xance kei e le
nu lei degji cu grasu xekri kei e le nu mi salpo fa'a lo dacti
noi simlu fi ny fe le ka mutce tolmelbi
-- i do tavla tai tu'a lo'e makcu prenu
ni'o la'e di'u rinka le nu mi milxe ckeji i ku'i ny nalkecti ke
jmina cusku di'e
-- i do piroda cfipygau i do piroda xregau
ni'o ny mutce se fanza je'u i ny deskygau bu'u le brife lei solji
skari kerfa
-- i mi djuno fi lo plini poi se zvati lo xunre nanmu i ny noroi
sumne lo xrula i ny noroi catlu lo tarci i ny noroi prami lo prenu
i ny noroi zukte na'e bo lo nu kanji i ze'a ro donri ny rapli
cusku tai tu'a do lu mi junri nanmu i mi junri nanmu li'u i la'e
di'u rinka le nu ny jgira i ku'i ny na nanmu i ny gumri
-- i ny mo
-- i ny gumri
ni'o le cmalu noltrube'a cu blabi ri'a le nu fengu
-- i ze'u lo nanca be loi megdo lo'e xrula cu zbasu lo'e kinli
iji'a ze'u lo nanca be loi megdo lo'e lanpanzi cu citka lo'e
xrula i xu na junri fau le nu sisku le nu jimpe le du'u ki'u
makau xy tai gunka le nu zbasu lo'e kinli poi selfu fi noda i xu
na vajni fa le nu jamna fa lo'e lanpanzi lo'e xrula i xu na
zmadu fi le ka vajni e le ka jai fau junri kei fe lei nu kanji
fa lo rotsu ke xunre nanmu i mi se slabu lo xrula noi pamei se
steci fi le munje zi'e noi zasti bu'u no na'ebo le mi terdi zi'e
noi lo cmalu lanpanzi ka'e daspo ze'iku taiku ca lo cerni secau
le nu ly sanji le se gasnu i xu la'e di'u na vajni
ni'o ny xunre binxo ibabo di'a co'e
-- i le nu da prami lo xrula noi zasti fa pa ke'a bu'u lei megdo
be lei megdo be lo'e tarci cu banzu le nu da gleki le nu catlu
ty i da cusku fi da fe lu le mi xrula cu zvati piso'u ta li'u i
ku'i le nu le lanpanzi cu citka le xrula cu simsa ci'o da lo'e
nu ro tarci cu suksa naltergu'ibi'o i uesai na vajni fa la'e di'u
ni'o ny na kakne le nu jmina cusku i ny spoja le nu klaku i le
nicte ba'o tolcanci i mi ba'o crugau lei mi tutci i mi ja'asai
ckasu le mi mruli e le mi klupe e le nu taske e le nu morsi i
zvati lo tarci di'o lo terdi no'u le memimoi no'u la terd fa lo
cmalu noltrube'a noi nitcu le nu se kurji i mi jgari ny lei birka
i mi sligau ny i mi cusku fi ny fe lu le xrula poi do prami cu na
se ckape i mi ba pirfi'i lo molgai seva'u le do lanpanzi i mi ba
pirfi'i seva'u do lo marbi be le do xrula i mi li'u i mi na djuno
fi le nu ei mi cusku makau i mi cinmo le nu mutce le ka juxre i
mi na djuno fi le nu ta'i makau mi ny penmi gi'a pruxi jorne i
tai cizra fa le se klaku gugde
--------------------------
mu'o mi'e xorxes
_________________________________________________________________
MSN Photos is the easiest way to share and print your photos:
http://photos.msn.com/support/worldwide.aspx