Le Petit Prince - X

["Jorge Llambias" <jjllambias@hotmail.com>]

(The first part of this chapter had already been translated
by Greg. I used some of his translation when doing mine.)

------------------------------------

ni'o ny zvati le kensa be lei plinycma no'u li 325 joi li 326
joi li 327 joi li 328 joi li 329 joi li 330 i seki'ubo pamai
ny vitke fi py tezu'e le nu zukte da gi'e cilre

ni'o le pamoi cu se xabju lo nolraitru i le nolraitru cu zutse
fi'o dasni le nukni je rankre lo ritli stizu noi sampu jeku'i
banli

-- i a'e lo se turni --sei le nolraitru ca lenu ny viska le
cmalu noltrube'a cu krixa cusku

ni'o le cmalu noltrube'a cu preti cusku fi vo'a fe lu ta'i ma
ta ka'e djuno fi mi va'o le nu ta mi pu noroi viska li'u

ni'o ny na djuno le du'u ga'a lo'e nolraitru le munje cu sampu
mutce i ro remna cu ga'a se turni

-- i ko jbikla tezu'e le nu mi do semau viska --sei le nolraitru
noi mutce jgira le nu uo nolraitru da cu cusku

ni'o le cmalu noltrube'a cu kanla sisku lo'e se zutse iku'i le
plini cu culno le banli ke rankre kosta iseki'ubo ny sanli stali
i ri'a le nu ny tatpi kei ny sipfru

-- i ga'i le nu sipfru cu naldrani nu tarti va'o lo'e nu lo
nolraitru cu zvati --sei le nolraitru cu cusku-- i mi tolcurmi
la'e di'u

-- i mi ka'enai fanta --sei le cmalu noltrube'a cu spuda cusku--
i mi puze'a klama gi'enai sipna

-- iseki'ubo --sei le nolraitru fi ny cusku-- mi do minde le nu
do sipfru i mi ze'u lo nanca be li so'i naku zgana lo nu da
sipfru i lo'e nu sipfru cu rirci cinri mi i o'ocu'i ko za'ure'u
sipfru i mi minde

-- i la'e di'u se xanka mi i mi na kakne le nu ranji --sei le
cmalu noltrube'a cu xunre binxo

-- i o'ucu'i --sei le nolraitru cu spuda-- i i'a mi do minde le
nu do ga sipfru ginai sipfru

ni'o ny milxe le ka fi'usku kei gi'e simlu le ka se fanza

ni'o le noltrube'a cu se vajni le nu zu'i sinma le nu ny catni
i ny na renvi lo'e nu toltinbe i ny traji le ka turni i ku'i
ki'u le nu ny mutce le ka xendo cu minde fi lo'e racli

ni'o lu va'o le nu mi minde --sei ny ta'e cusku-- i va'o le nu
ge mi minde lo jatna le nu binxo lo xamsi cipni gi le jatna na
tinbe cu fuzme fa le jatna na.e mi li'u

-- i e'apei mi zutse --sei le cmalu noltrube'a cu toldarsi
retsku

-- i mi do minde le nu do zutse --sei le nolraitru noi nobli
crepu lo pagbu be le ny rankre kosta cu spusku

ni'o ku'i le cmalu noltrube'a cu se spaji i le plini cu
cmatcetce i le nolraitru cu ka'e turni ma

-- i doi nobli --sei cyny fi ny cusku-- ko mi fraxu le nu mi
retsku fi do

-- i mi do minde le nu do retsku fi mi --sei le nolraitru zi
sutra cusku

-- i doi nobli y do turni ma

-- i roda --sei le nolraitru fau lo nu mutce sampu cu spusku

-- i xu roda

ni'o le nolraitru cu sampu farja'o le ny plini e lei drata
plini e lei tarci

-- i xu turni ro tu --sei le cmalu noltrube'a cu cusku

-- i turni ro tu --sei le nolraitru cu spusku

ni'o ny turni co traji po'onai je pizrolmunje ji'a

-- i xu lei tarci cu tinbe fi do

-- i li'a go'i --sei le nolraitru cu cusku-- i ty zi tinbe i mi
na renvi lo'e nu toltinbe

ni'o le tai nu vlipa cu se manci le cmalu noltrube'a i romu'ei le
du'u ri tai vlipa kei ri kakne le nu zvati vovo po'onai solri nu
canci a zereboi ji'a sy a panonoboi ji'asai sy a renonoboi ji'acai
solri nu canci kei ca pa djedi gi'e noroi bevri le stizu i mu'i le
nu ny cinmo lo milxe nu badri kei ri'a le nu morsi le ny se cliva
ke cmalu plini cu darsi le nu cpedu lo se dunda le nolraitru

-- i mi djica lo'e nu viska lo solri nu canci i e'o gau ko pluka
mi i ko minde le solri le nu canci

-- i va'o le nu da'i ge mi minde lo jatna le nu vofli klama lo
xrula lo drata tai tu'a lo toldi kei a le nu finti lo draci kei a
le nu binxo lo xamsi cipni gi le jatna na tinbe le te minde zo'u
jy ji mi fuzme srera

-- i do go'i --sei le cmalu noltrube'a cu jdari cusku

-- i drani i ei zu'i minde roda lo se kakne be da --sei le
nolraitru di'a cusku-- i lo'e nu catni cu ralju se jicmu lo'e nu
racli i va'o le nu zu'i minde lei ri prenu le nu plipe le xamsi
cu ba catni fapro fa py i mi le nu bapli cpedu le nu tinbe cu
zifre ki'u le nu mi racli minde

-- no'i le mi solri nu canci cu mo --sei le cmalu noltrube'a noi
noroi tolmorji fi lo preti ca le nu ba'o cusku cu mrogau

-- i le do solri nu canci zo'u do ba lifri i mi ba cpedu bapli i
ku'i mi ba denpa ji'u le mi turni saske le nu lei vanbi cu mapti

-- i la'e di'u cabna ma --sei le cmalu noltrube'a cu djuno cpedu

-- i y y --sei le nolraitru noi ca'o tadni lo barda veldetri cu
spusku-- y y cabna y y le zi vacni ti'u li ji'i ze pi'e vono i
do ba zgana le nu mi ja'asai te tinbe

ni'o le cmalu noltrube'a cu sipfru i ny xenru tu'a le ny se
claxu ke solri nu canci iji'a ny xa'o milxe le ka se tolzdile

-- i einai mi vi zukte --sei ny fi le nolraitru cu cusku-- i ai
mi cliva

-- i ko na cliva --sei le nolraitru noi tai jgari le nu turni da
cu spusku-- i ko na cliva i ca'e do raljitro

-- i raljitro ma

-- i y le nu pajni

-- i ku'i no prenu vi ka'e se pajni

-- i na djuno --sei le nolraitru cu cusku-- i mi za'o na kuspe
litru le mi tutra i mi dukse le ka tolcitno i mi claxu lo'e
canlu be lo nobli carce i mi tatpi le nu cadzu

-- i a'i mi ba'o catlu --sei le cmalu noltrube'a noi salpo binxo
tezu'e le nu za'ure'u zgana le drata mlana be le plini cu cusku--
i noda zvati tu ji'a

-- iseva'obo do do ba pajni --sei le nolraitru cu spusku-- i traji
le ka nandu i le sevzi lo drata cu mutce zmadu le ka nandu fa le
nu pajni ce'u i lo'e nu do snada le nu do do pajni cu jarco lo'e
nu do ca'a prije

-- i mi --sei le cmalu noltrube'a cu cusku-- kakne lo'e nu mi mi
pajni ca makau i mi na nitcu le nu xabju ti

-- i y y --sei le nolraitru cu cusku-- mi birti le du'u lo
tolcitno ratcu cu diklo da le mi terdi i mi tirna ry ca lo'e nicte
i do ka'e pajni le tolcitno ratcu i do ry di'inai dapma le nu
mrobi'o i taiku le nu ry jmive cu ba jalge le nu do pajni i ku'i
do ry ba roroi fraxu ki'u le nu ei na xaksu ry i ry papo'omei

-- i mi --sei le cmalu noltrube'a cu spusku-- na nelci lo'e nu mi
dapma fi le nu mrobi'o iji'a mi birti le nu mi cliva

-- i na co'e --sei le nolraitru cu cusku

ni'o ku'i le cmalu noltrube'a noi bredi le nu cliva cu na djica
le nu drigau le tolcitno turni

-- i va'o le nu le banli nobli cu djica le nu satci se tinbe cu
ei minde fa ny mi lo racli i mu'a ny mi minde le nu mi cliva pu
lo mo'u mentu i le vanbi cu simlu le ka ca mapti

-- i le nolraitru cu spusku noda iseki'ubo le cmalu noltrube'a cu
ze'i senpi ibazibo fau le nu cnivasxu cu cliva

-- i ca'e do mi jansu --sei le nolraitru cu sutra ki'asku

ni'o ny catni mutce simlu

ni'o lu lo'e makcu prenu cu cizra mutce li'u se cusku le cmalu
noltrube'a ri ze'a le nu litru

-------------------------------

mu'o mi'e xorxes


_________________________________________________________________
MSN Photos is the easiest way to share and print your photos: 
http://photos.msn.com/support/worldwide.aspx