Re: jbopemci

["Jorge J. Llambías" <jorge@INTERMEDIA.COM.AR>]

>coi xorxes. no'i ki'u ledu'u le ca trijufra cu glijbo zo'oru'e keikuku
>fu'e.e'u cnino trijufra fra lu .e'usai ma'a la jbotur. finti joi facki li'u
>fu'o pa'a

coi maikl i ie le do jufra cu mapti i le greku be la lojban cu zasti
i ku'i le xadni be ly cu puzi co'a se finti i le brarai pagbu cu za'o
pu'o se facki

 >.i .iesai ki'anai le bau na ka'e se skicu cu ka'e se skicu sepi'o lo na'e
>bangu .i mi ru'inai cusku sebaupe'a lo cinlarcu .a lo zgilarcu fe ko'a goi
>le poi mi ke'a morji jenai ka'e valskicu ku'o jai sera'a lizysne .i ko'a fi
>mi sinxa fe ba'e zo'e .iku'i ko'a cafne le nalseljmi .ue .i va'i ko'a ruble
>ve skicu fe lemi selfri .i .e'ucu'i mi na djuno ledu'u makau ko'a ka'e
>zmadu leka skicu

i mi di'u jimpe i ko'a do po'o se lifri i ku'i do snada le nu benji
le sidbo mi sepi'o lo na'e drata be lo bangu i le nu mi'o se kampu
le ka remna cu rinka le nu lo nalprane velski cu banzu le nu cusku
i cumki fa le nu lo skami na jimpe le du'u makau smuni lu ko'a
ba'e zo'e mi sinxa li'u i ku'i mi noi ke'a do penmi lo bangu po'o
munje cu kakne le nu tolmifrygau le do smuni i mi krici le du'u
lo'e bangu cu vlipa

 >.i na'oku mi zo pe'a pilno lesi'o gismu smuni zenba sekai leka nalna'oke
>sumti stura .iku'i ju'eru'e zo pe'a na mulno leka terpli nu tugni .imu'a zo
>sarji .o lu sarji pe'a li'u vau .iza'a rinka co cfipu fi lenu lo gismu ka'e
>cairsucta ba'e jenai to tetai lei datybau toi pavyvla so'irsmu mo'unai
>la'acu'i

i mi troci le nu na pilno lo gismu le nu valsi lo se gismu
poi na mapti le jicmu stura i mi kufra le nu zo sarji ka'e valsi
le du'u da de di bandu kei a le du'u da de fo di falfanta
i pe'i lei terckini cu panrysi'u gi'e smisi'u

 >ni'o pemci .i'osai .ira'unaisai ma cimoi sumsmu zo skagau
>to sera'a lu lei satci tcila li'u toi

i le te skagau cu se skari i mi troci le nu cusku le du'u
bazu lo fasnu le menli cu te vreji lei tcila noi simlu le ka
satci zasti kei gi'e ku'i ca'a se xanri  i ta'o pe'i lu da de di
rodgau li'u cu roroi smumi'u lu da gasnu le nu de di broda

 >ni'o di'e se tcita lu lanci li'u .itu'e
>
>fela'i bivmast. so'amoi
> fale cerna .i catlu
>lei snime .icabo
> pinxe le vanju
>co rismi .i le ctino
> ze'i clani ra'i
>le noi cinla dilnu
> trixe zi'e poi
>cacrygaltu
> ku'o solri .i
>mi kactro .i mi mutce
> jijnu fi zi'o
>
>.i ci'urnandu
> sinxa .i marji
>tcita je selfinti
> bo cmene .i le cinmo
>zu'avi xanri
> norcro .i .ue le
>selci'o soi vo'a
> claxu
>
>tu'u co'o mi'e maikl.

i lu da noi darno li'u di'e tcita i tu'e

i mi xabju le papamoi be lei loldi be lo dinju
noi se stuzi le raltcadu pe le gugde be lei gento
i le nu klama le kadno zu ci masti cu se rinju
mi le nu kansa le prenu poi mi pensi ca ro mentu
i le cinfo skari rirxe
ca ro cerni
mi rinsa pa'o le canko
le nu mojgau mi le nu
mi pu gleki i mi so'uroi
sajbi'o le nu jmive

tu'u
co'o mi'e xorxes