la genjo,koan.

[Spigot <spigot@neuron.net>]

lu la genjo,koan. li'u cu tcita di'e ne fi'e la dogen .i tu'e

ro fasnu cu jicmu fasnu
    .icabo jitfa jimpe gi'e jetnu jimpe gi'e bancu gunka gi'e co'a jmive
    gi'e co'a morsi gi'e jicmu prenu gi'e ckini prenu

.i ro fasnu cu to'e se sevzi
    .icabo na jitfa jimpe gi'e na jetnu jimpe gi'e na jicmu prenu
    gi'e na ckini prenu gi'e na co'a jmive gi'e na co'a morsi

.i le jicmu tadji cu bancu le ka zmadu .e la ka mleca
    .iseja'ebo co'a jmive gi'e co'a morsi gi'e jitfa jimpe
    gi'e jetnu jimpe gi'e ckini prenu gi'e jicmu prenu

ni'o

la'edi'u jetnu .iku'i sa'u le xrula co'a morsi ca le nu djica
.ije le zunti spati co'a to'e canci ca le nu fapro

ni'o

.i le nu do crakla bevri le sevzi tezu'e cipra le ka zasti ro fasnu kei
    ca'a jitfa jimpe
.i le nu ro fasnu cu crakla seja'e jarco le ka sevzi kei
    ca'a jetnu jimpe

ni'o

.i ro da poi da jetnu jimpe le ka jitfa jimpe cu jicmu prenu
.i ro da poi da jitfa jimpe le ka jetnu jimpe cu ckini prenu

ni'o

ji'a lo prenu cu jetnu jimpe le ka jetnu jimpe
.ije lo prenu cu jitfa jimpe le ka jitfa jimpe

ni'o

ganai da noi jicmu prenu cu ca'a du le ka jicmu prenu
    gi da na'e nitcu le sanji le ka jicmu prenu
.iku'i da ca'a jicmu prenu
    gi'e ca'o ca'a du le ka jicmu prenu

ni'o

da poi xadni je menli gunma te viska le tarmi goi ke'a ku'o .e
de poi xadni je menli gunma te tinzga le sance goi ke'a ku'o
se sanji .o'ecai
.iku'i la'edi'u na simsa le minra

ni'o

.i le nu da tadni le jicmu tadji cu mintu le nu da tadni le da sevzi
.i le nu da tadni le da sevzi cu mintu le nu da stimo'i le da sevzi
.i le nu da stimo'i le da sevzi cu mintu le nu da selgre ro fasnu
.i le nu da selgre ro fasnu cu se jalge
    le nu farlu se canci le xadni je menli
    po da .e ro drata
.i le terli'a be fi le pagre cu canci
.ije le nu tolterli'a pagre cu roltei ranji