tecu'u le cnino bartu

["Jorge Llambias" <jjllambias@hotmail.com>]

mi pu troci le nu mrilu la'e di'e de'i li remupi'eze
i ku'i li'a mi na snada i rere'u troci

------------------------------------------------------

zo kevna cu pagre le vorme ca'ocma le prenu poi crane
be le vorme be'o le prenu poi trixe be le vorme i ze'epu
noroi sarcu fa le nu spuda lo mipri valsi kei le nu nerkla
le ckafybarja i ku'i le vitke cu se spaji nagi'enai se cfipu
i le danfu cu slabu vy noi noda pu cusku dy ke'a i vy
ja'e le nu le vorme se kargau cu bacru zo ctino

ni'o nenri i so'o voksa cu se mixre i da gleki le nu
le kumfa cu minji zanlenku ki'u le nu crisa gi'e le
bartu vacri cu gladu'e i lo drata cu gleki le nu le kumfa
cu fagri zangla ki'u le nu dunra gi'e le bartu vacri
cu lekydu'e i roda kufra i lei se casnu cu vrici
i ma ba ka'e zgana le bazi nu le lunra cu gacri
le solri i lei na'e te toltugni no'u mu'a le nu jamna
pe le ropno midju cu sutra se pinka gi'e se tolmorji
i lo vajni nundau cu se tisna le piso'e be le temci
i ma satci smuni zo tanbo i xu lo tanbo ka'e se
tarmi lo kurfa i da jinvi le du'u go'i i de da na tugni
i da tolzbasu lo mudri stizu gi'e jarco le se zutse
pagbu de gi'e krixa lu ti tanbo i ti krufa tanbo li'u
gi'e jibni le nu lamjygau le dacti le de stedu tezu'e
le nu cipra le nu di'u jetnu i ku'i de na curmi le nu
te stidi i bazaku preti fa le du'u makau satci smuni
le du'u lo prenu cu nanca lo namcu  i xu le cabna
prenu cu mintu le balvi prenu i xu lo rirxe ka'e reroi
se vitke i lei zvati cu jdice le du'u le munje ba mulno
gi'e se fanmo de'i li reki'o

ni'o le vitke be le ckafybarja cu cliva i vy pensi lei
xanto pe le duntubzda targri i go'i lei ti'ocpi poi xy
finti i vy viska lo nanmu noi dasni lo cizra da'ermapti
noi se jadni loi skori ku joi loi jinme verla'a i lo jmaji
cu nitcu lo jitro sidbo ca le nu zenba i oi

co'o mi'e xorxes