Epictetus, Discourses 1.1

[Nick Nicholas <nicholas@uci.edu>]

pamo'o me zo'e pe ji'o ma'a ge'u .e zo'e pe ji'onai ma'a

ni'o da'a da poi te lanli zo'u: rodo na zatfa'i da poi ge zo'e lanli da da;
gi seni'ibo da jetycipra fi da gi'a jifcipra fi da
.i le genske cu ckaji leka lanli ji'e ma?
.i lenu pajni loi se ciska
.i le zgiske ji'e ma?
.i lenu pajni loi se zgisku
.i su'o da pe di'u zo'u: ja'opei xu lanli da da?
.i na go'i
.i ku'i zu'u ca lenu do ciska lo xatra be lo pendo kei
lo ba se ciska cu se claxu nagi'a se jdice sepi'o le genske
.i le jei zu'unai do ba ciska lo xatra kei na se jdice sepi'o le genske
.i le mintu cu srana lei se zgisku kufa'u le zgiske
.i le jei ca sanga gi'e zgipli le jgitrlira kei
 .e lejei ca sanga nagi'enai zgipli le jgitrlira
na se jdice sepi'o le zgiske
.i ja'ebo se jdice sepi'o ma?
.i le te lanli poi lanli vo'a .e ro drata
.i ma sa'e go'i?
.i le racli
.i ki'ubo ri romei le'i se cpacu selkai poi zo'e jimpe sepi'o ke'a ---
nu'ige fi ke'a fe leka ke'a makau ckaji .e leka ke'a makau kakne
 .e leka ke'a makau se vamji ba'o lenu se cpacu ---
nu'u fi ro drata
.i lo drata po'u ma paunai jai ji'u xusra ledu'u le solji cu melbi?
.i ki'ubo le solji na xusra
.i birti fa ledu'u le racli cu ge te lanli gi pilno lei se ganse
.i lo drata po'u ma cu jai sepi'o pajni le genske .e le zgiske
 .e le drata te lanli
gi'e cipra fi le te pilno be le drata
gi'e jai ji'u stidi le mapti temci be le nunpilno?
.i noda

ni'o seni'ibo la'edi'e cu mapti
.i le vlirai je jitro be ro le'i te lanli be'o po'o cu te jitrygau ma'a le
cevni
.i go'i fa le drani ka pilno le se ganse
.i ku'i ro drata na te jitrygau ma'a
.i xu .a'i go'i mu'i lenu le cevni na djica?
.i pe'isai ganai kakne gi curmi lenu ma'a jitro le drata ji'a
.i ku'i ba'e na kakne
.i ri'a lenu ma'a diklo le terdi gi'e se rinju lo terdi xadni
 .e lo terdi se cecmu kei
noda laknyri'a lenu ma'a na se tolsidju loi bartu be ma'a

ni'o ku'i la zdeus cusku ma?
.i "lu doi .ePIkteetos. mi ka'e naja pu'i rinka
lenu le malxadni be do be'o .e le malselponse be do cu jai zifre
 je jai nalselrinju
.i ku'i caziku (to ko ca'o morji toi) ti poi xadni cu na'e se ponse do
gi'e po'o melbi se tarmygau pesxu
.i ku'i mu'i lenu mi na ka'e rinka la'ede'u kei
mi'a dunda fi do fe lo pagbu be mi'a be'o
po'u le de'u te lanli pe le nuncuxna .ebo le nuntolcuxna
.e le nundji .ebo le nuntoldji
zi'e po'u to'u leka pilno lei se ganse
.i ja'e lenu do kurji le se go'i gi'e tinbygau roda pedo le se go'i kei
do banoroi se fanta gi'e banoroi se rinju
gi'e bana crocmo gi'e bana te mabla ja te zanba su'o prenu
.i pe'ipei xu la'edi'u tolvajni li'u"
"lu .i ba'e na go'i li'u"
"lu .i xu seni'ibo ra banzu tu'a do? li'u"
"lu .i .a'o le cevni cu curmi lenu go'i li'u"

ni'o mu'inai lenu ma'a ka'e kurji pada gi'e ka'e jundygau ma'a pada kei
ma'a zmanei lenu kurji so'eda gi'e jai se sarcu so'eda
.i se sarcu le xadni .e le se ponse .e le burna .e le pendo .e le panzi
 .e le selposysefpre
.i ja'o ma'a jai se sarcu so'eda gi'e seni'ibo tijycni da gi'e dizlo se
rinju da
.i semu'ibo ma'a ca le da'i nu na se falnu cu zutse gi'e dunku muvdu
gi'e di'i sructa
.i "lu .i brife ma? li'u"
"lu .i le berti li'u"
"lu .i mu'i ma le berti cu raktu mi
.i ca ma brife le snanu? li'u"
"lu .i ca lenu le snanu cu jdice doi xamgu; .a lenu la .AIolos. jdice
.i ki'ubo le cevni ba'o fuzmygau fi le brife fe genai do gi la .AIolos li'u"
"lu .i ja'ebo mo? li'u"
"lu .i ma'a bilga lenu rinka lenu roda peji'o ma'a cu xagrai kei kei
 .e lenu pilno le drata tu'a le jinzi be ri li'u"
"lu .i ku'i ma jinzi? li'u"
"lu .i le pu se jdice be le cevni li'u"

ni'o "lu .i xu ja'o mi romei le'i ba se sfane'orka'a li'u"
.i go'i gi'onai mo?
.i xu do djica lenu roda se sfane'orka'a kei mu'i lenu do xaucni?
.i xu do na djica lenu tengau le cnebo gi'e trasmi la lyteraNOS. pevi la romas.
zi'eneba lenu la neron. minde lenu se sedvi'u?
.i pu tcena le cnebo gi'e se darxi
.i mu'i lenu le ve xrani cu ruble cu ze'i toltengau gi'ebabo rere'u tengau
.i ji'a pubo ca lenu lo prenu cu klama la .epafROditos.
no'u le co'u selposysfepre be la neron.
gi'e ve preti fi ra fe lenu makau zekri kei kei
le prenu cu cusku "lu .i mi ganai djica da gi tavla le se selfu be do da li'u"

ni'o "lu .i seni'ibo .ei bredi pilno ma pe ma'a la'edi'u? li'u"
.i no drata .ue be le ka ce'u djuno ledu'u makau ce'u steci
 .e ledu'u makau ce'u na steci
 .e ledu'u makau ce'u se curmi
 .e ledu'u makau ce'u na se curmi
.i mi ba morsi .i .eipei ca'o da'i cmoni?
.i selsfari'u  .i .eipei ca'o da'i drisku?
.i se livbai
.i xu da fanta lenu ca'o cisma gi'e gleki gi'e panpi?
.i "lu .i ko cusku le mipri li'u"
"lu .i .ai mi na go'i .i ri'abo go'i da'i ji'o mi li'u"
"lu .i semu'ibo do mi selsfari'u li'u"
"lu .i doi prenu do cusku ma .ue? .i xu go'i mi?
.i do se rinju le tuple be mi
.i le ka vrude cuxna pe mi la zdeus. ji'a na ka'e rinju li'u"
"lu .i mi do punji le tolzifstu li'u"
"lu .i go'i le malxadni po'o li'u"
"lu .i mi sedvi'u do li'u"
"lu .i ca ma paunai mi pu cusku fi do
fe lesedu'u le cnebo be mi po'o ka'enai se katna? li'u"
.i la'erodi'u cu .ei se tadni le junji'uskepre
.i la'erodi'u cu .ei se ciska le prenu di'i lo djedi
.i la'erodi'u cu .ei se cretoi le prenu

ni'o la traseas. ta'e cusku "lu .i mi zmanei lenu se catra ca le cabdei kei
lenu se livbai ca le bavdei kei li'u"
.i semu'ibo la rufus. cusku di'e la traseas.
.i "lu .i ganai zu'u do cuxna mu'i lenu raktymau gi bebna .ue
.i ganai zu'unai do cuxna mu'i lenu raktyme'a gi ma curmi lenu do cuxna?
.i xu do na djica lenu tadni le ka se banzu le se curmi pe do? li'u"

ni'o semu'ibo la .agripinos. cusku di'e
.i "lu .i .ai mi na fanta tu'a mi li'u"
.i cusku fi .abu fe "lu .i lei kratrsenatore cu pajni tu'a do li'u"
.i "lu .i .a'o xaurfunca
.i ku'i li mu ca tcika
{sei .abu ti'u li mu di'i slupli jebabo lekyjirnu se'u}
.i .e'u mi'a cliva gi'e slupli li'u"
.i zo'e ba'o lenu .abu slupli cu klama gi'e cusku fi .abu
fe "lu do ba se sfasa li'u"
.i "lu --- fo lenu se livbai gi'i morsi? li'u"
"lu .i gi'enai li'u"
"lu .i le se ponse be mi cu mo? li'u"
"lu .i na se sfavimcu li'u"
"lu .i semu'ibo .e'u ma'a klama la .arikias. gi'e citka vi ri li'u"
.i la'erodi'u nu ba'o tadni loi bilga se tadni
gi'e bredygau le nundji .e le nuntoldji leka zifre .e leka na funca
.i mi morsi
.i ganai bazi go'i gi baca'a go'i
.i ganai baza go'i gi mi cazi citka mu'i lenu tcika le di'i nuncti kei
gi'e babo morsi
.i morsi ca lenu tarti ma?
.i le mapti be lo xrudunda be lo datselpo'e

Nick Nicholas,  TLG, UCI, USA.   nicholas@uci.edu    www.opoudjis.net
"Most Byzantine historians felt they knew enough to use the optatives
 correctly; some of them were right." --- Harry Turtledove.