On Mon, Oct 18, 2010 at 11:23 PM, Stela Selckiku
<selckiku@gmail.com> wrote:
ju'i lobypli .i ti'e so'i jbopre cu xebni lo si'o cimjvo .e ni'i bo zo
cimjvo .i mi djica lo nu gentilsnu .i .y. cumki fa lo nu za'e zo
smutilsnu cu zmadu mapti .i mi djica lo nu smutilsnu .i mi nelci lo
si'o cimjvo kei li'a .i mi pu finti zo cimjvo .i mi na finti so'i
cimjvo .i zo cimjvo cu cimjvo mu'i lo nu lo smuni cu sarxe lo tarmi .i
mi simsa mukti finti zo nalsa'uslakyskute'a mu'a noi lo
nalsa'uslakyskute'a cu terpa lo nu cusku ke'a .i mi na finti zo
.u'ivla .i je ku'i zo .u'ivla noi .u'ivla cu simsa fi lo ka smuni je
tarmi sarxe .i lo nu so'i prenu cu pilno zo cimjvo kei .e lo nu binxo
lo se xebni cu je'u spaji mi .i mi finti so'i lujvo poi no da pilno ja
nelci .i ku'i mi ca fuzme lo misno nu cimjvo kei lo jbopre .i .ai
ciksi .i .ai mi jinvi lo du'u xamgu
ni'o .a'o lo xebni be lo nu cimjvo cu ciksi lo nabmi ro ma'a .i mi na
kakne lo nu ciksi kei ki'u lo za'i mi na jimpe .i mi na pu krici lo
du'u lo jboklu cu na ponse pe'a lo sidysmu .i mi krici lo du'u lo
jbopre cu te sidbo lo sidysmu poi cnino zi'e poi klunu'i ki'u lo za'i
no malrarklu cu finti .i lo gimste mu'a cu cafne xusra so'i du'u lo
gismu cu kakne se pilno fi lo steci sidysmu nu finti .i mi pu krici lo
du'u lo da'i lobykai sidysmu cu ta'e sampu je filterjmi .i lo si'o no
roi sidysmu cu cnino mi .i zo pe'a cu zasti za'a .i .ia ru'e la
.camgusmis. cu xebni ro nu pilno zo pe'a .i xu di'u jetnu .i cizra mi
ni'o mi tavla fo lo ma'a mlebau mu'i lo nu tavla lo lobypli .i mi
traji se cinri lo se xusra be lo lobypli .i xu lo si'o cimjvo cu sarxe
lo jbobau poi do pilno ju'i lobypli .i mi na'e jdari pe'a jinvi .i
da'i lo nu finti so'i cimjvo cu daspo la .lojban. .i je mu'i la'e di'u
mi co'u nelci gi'e pilno zo sidysmujvo .i .e'o darlu .i .e'o lobdau
mi'e .telselkik. mu'o