Re: [lojban] lo tcidu bende pe la nicte cadzu — 24moi lo spisa

[selpahi <seladwa@gmx.de>]

ni'o dy jarco tu'a lo cecla pagbu sy se cu'u lo'u ti poi cmalu cuxyvra 
cu le'u ju'e lu ta'a .deivid. ma se smuni zo cuxyvra li'u ju'e lu lu xy 
xi pa vraga lo nu cuxna fi xy xi re kei li'o li'u .i ti traji lo ka 
vajni kei fo lo ro xumjimcelxa'i pagbu .i lu lo celgunta cuxyvra li'u .a 
lu le curmi li'u cu cmene ti .i lo nu ti blabi cu sinxa lo nu na kakne 
lo nu celgunta .i lo nu ti xunre to'i dy ca pilno le curmi ja'e tu'a lo 
xunre toi cu sinxa lo nu do celgunta zifre to'i dy re re'u pilno le 
curmi toi .i ko ro roi bevri lo cecla do'e le blabi curmi .i ji'a ko ro 
roi catlu le curmi ca lo nu do co'a bevri lo cecla gi'a djica lo nu 
celgunta .i bi'u ti to'i dy jarco lo skuro .e lo jesni toi farna facki 
tutci .i ji'a lu le facki li'u ji'a cmene ti mi'a .i do pilno le facki 
lo nu sidju lo nu xrani lo bradi vau ta'i lo nu viska lo linji be le 
jesni bi'o le skuro bi'o lo bradi .i bi'u ti to la'a do djuno toi se 
lacpu tutci gi'e rinka lo nu celgunta vau ri'a lo nu do lacpu ti .i xu 
do ca jimpe li'u ju'e lu go'i li'u ju 'e lu xamgu .i ko celgunta lo va 
rapcreze'a papri li'u

ni'o sy muvgau le cecla lo jibni be pa kanla .i .ue sai pu lo nu sy 
celgunta vau dy darxi le stedu be sy gi'e cusku lu da'i do mrobi'o .i do 
pu na catlu le curmi .i se ki'u bo da'i ca'o lo nu do se cfipu lo nu na 
celgunta vau lo bradi cu klama je catra do li'u ju'e lu .u'u do drani .i 
xu do curmi lo nu mi za'u re'u troci li'u ju'e lu li'a sai mi'o nenri lo 
repcreze'a kumfa .i se ki'u bo .u'i mi pavypa'a lo nu do jai rapli fai 
lo nu celgunta vau li so'i sai li'u .i sy tugni spuda gi'e catlu le 
curmi gi'e pilno ri gi'e muvgau le cecla lo jibni be pa kanla gi'e lacpu 
le xumjicelxa'i se lacpu tutci .i lo munje po sy curve lo ka cladu

ni'o lu do jukpa ma doi .djen. li'u se cusku la .susan. .i dy cusku lu 
lo jipci li'u gi'e dunda fi sy pa botpi be lo sluji surla rinka xumki .i 
sy cmila gi'e cusku lu ta'i ma do djuno li'u .i dy cusku lu doi verba mi 
ze'u sai bu'u mikce .i je ro remna poi pa re'u pilno lo brabra dacti poi 
mi'o te cmene ke'a zo xumjimcelxa'i cu cortu lo janco .i mi ba zi dunda 
lo jipci li'u

--
You received this message because you are subscribed to the Google Groups "lojban" group.
To unsubscribe from this group and stop receiving emails from it, send an email to lojban+unsubscribe@googlegroups.com.
To post to this group, send email to lojban@googlegroups.com.
Visit this group at https://groups.google.com/group/lojban.
For more options, visit https://groups.google.com/d/optout.