Re: [lojban] lo tcidu bende pe la nicte cadzu — 35moi lo spisa

[selpahi <seladwa@gmx.de>]

.i traji vlipa remna cinmo lo ka xebni gi'a fengu .e lo ka terpa .e lo 
ka cinse djica .i ry .e cy pu pu za ca'o terpa gi'e xebni .i ji'a ry .e 
cy pu di'i rapcreze'a lo nu lifri lo mutce nu cinse djica kei ca lo nu 
ckape .i cy pu krici lo du'u lo nu pilno le ci vlipa cinmo .e lo logji 
noi la fekcrida cu ba'e traji xebni cu rinka lo nu la fekcrida cu zi 
fenki binxo to'i camlu denpa toi .i za'a cai cy drani .e'e sai dai .io 
sai li'u

ni'o sy desku pa'a da poi pu zi se darxi .i sy smaji sai cusku lu do'o 
na pu troci lo simsa be le pu zi fasnu li'u .i ry smaji cusku lu na go'i 
li'u .i ba ze'a bo sy smaji .i ba bo sy cusku lu ma rinka lo nu la ctino 
poi fenki cu canci li'u .i cy cusku lu ge nai canci gi daspo .ui sai .i 
la ctino cu menli po'o lo na zasti .i lo nu lo menli po'u la ctino cu se 
daspo cu mintu lo nu ri se daspo .i ji'a la ctino cu pilno lo cmalu 
jemna lo nu sidju fi lo nu stali lo bu'u munje .i la'a la fenki ctino 
poi ca'o pilno le jemna cu kakne lo nu stali .i ku'i do'o daspo le jemna 
.i'o sai li'u

ni'o pi so'u roi tavla ca lo ve vimcu be fi lo nu klama .i ba bo la 
.deivid. gidva sy lo nu pinxe lo glare gi'e pilno lo diklo ckana .i vy 
kurji sidju .i sy gleki lo nu go'i .i vy gasnu lo nu sy snura cinmo .i 
ji'a sai sy pensi lo nu cpedu lo nu vy joi vo'a sipna .i ku'i sy krici 
lo du'u le se djica cu se rinka lo nu terpa .i da'i lo nu sy na kakne lo 
nu renvi lo nu terpa cu tcetce mukti lo nu sy na kalte binxo .i se ki'u 
bo sy pilno lo ckana poi vy facki va'u sy gi'e ba zi sipna

--
You received this message because you are subscribed to the Google Groups "lojban" group.
To unsubscribe from this group and stop receiving emails from it, send an email to lojban+unsubscribe@googlegroups.com.
To post to this group, send email to lojban@googlegroups.com.
Visit this group at https://groups.google.com/group/lojban.
For more options, visit https://groups.google.com/d/optout.