Re: [lojban] lo tcidu bende pe la nicte cadzu — 60moi lo spisa

[selpahi <seladwa@gmx.de>]

ni'o vo pi ci mo'o nu jmaji

.i la .susan. nergau le citka kumfa ba lo nu rapcreze'a lo dabytadji 
gi'e cusku lu li'a mi'o ba zi gunta ma li'u .i la .stefen. cu cmalu 
cisma gi'e cusku lu la rokyka'argau li'u ju'e lu .y. zo rokyka'argau cu 
lujvo fo ma .u'u li'u ju'e lu lu rokci katna gasnu li'u li'u ju'e lu 
.yyyy. .ua nai la rokyka'argau xu cu mipri girzu gi'e na ca'a katna lo 
rokci gi'e gasnu lo mipri ritli gi'e sidju lo verba .e lo simsa li'u .i 
la .stefen. milxe fengu cusku lu doi .deivid. ko zenba lo ka certu ctuca 
la .susan. li'u .i vy cusku lu .u'u ru'e sy nelci lo nu damba .e nai lo 
nu jundi ve cusku .i ji'a mi troci to'i sy ca co'a cusku toi li'u .i sy 
cusku lu na jetnu .i mi mutce certu lo ka jundi .i mu'i ma du cusku to'i 
sy ca zgana lo du'u cy troci lo nu na cisma .i se ki'u bo sy co'u tavla 
toi li'u .i sy milxe bo fengu je se zdile catlu vy

ni'o cy cmalu cmila gi'e cusku lu la rokyka'argau cu ro roi damba la 
nicte cadzu tu'a lo remna .i so'a banli cmima be ry ky gy cu se lijda fi 
lo daspo fekcrida .i ku'i so'a to'e banli cmima cu fe'u po'o sidju lo 
verba gi'e te ritli fi lo to'e vajni gi'e pilno lo mipri xance bo jgari 
tadji gi'e vrici to'e vajni .i ma'a damba ry ky gy ze'u li nanca be li 
so'o no no li'u .i sy cusku lu .ue sai mi pu krici lo du'u la 
rokyka'argau cu cizra li'u

ni'o sy cusku lu ta'o nai la rokyka'argau cu gasnu ma li'u .i la 
.deivid. cusku lu lo nu troci lo nu daspo lo barda dinju gi'e catra so'i 
remna .i ry ky gy zerle'a? so'i tabykrili .i se ki'u bo ny cy djuno lo 
du'u ba troci lo nu zbasu lo rokci remsmimi'i .i xu mi pu ciksi lo 
remsmimi'i do li'u ju'e lu xu makfa minji gi'e se tarmi lo remna li'u 
ju'e lu go'i .i lo rokci remsmimi'i cu tcetcetce tsali gi'e jai nandu 
fai lo nu catra .i se mu'i bo ny cy troci lo nu facki le se diklo be lo 
nu zbasu .i ji'a snada .i ry ky gy se ritli ca le cabycta bu'u le 
jesydinju po la merko banxo li'u ju'e lu xu lo pulji cu kansa mi'o lo nu 
gunta li'u ju'e lu go'i .i mi'o penmi py ze'o le jesydinju li'u

--
You received this message because you are subscribed to the Google Groups "lojban" group.
To unsubscribe from this group and stop receiving emails from it, send an email to lojban+unsubscribe@googlegroups.com.
To post to this group, send email to lojban@googlegroups.com.
Visit this group at https://groups.google.com/group/lojban.
For more options, visit https://groups.google.com/d/optout.