Re: [lojban] lo tcidu bende pe la nicte cadzu — 63moi lo spisa

[selpahi <seladwa@gmx.de>]

ni'o sy zi pa pastu remna cu jgari re makfa dakfu noi ny cy pu za dunda 
ke'a sy .i le remna cu troci lo nu darxi sy lo dakfu .i ku'i sy 
sezmuvgau se pi'o ro nilisutra be lo blupinxe .i se ri'a bo le dakfu cu 
katna lo vacri po'o .i ba zi bo sy punji pa dakfu re pinca rango .i se 
ri'a bo le rembna cu cortu krixa gi'e farlu .i ji'a sy ri'u tirna lo 
krixa be lo remna poi vy gunta

ni'o fi'o suksa bo le remsmimi'i cu lacpu lo birka ze'o le loldi .i sy 
bajra fa'a le remsmimi'i goi ko'a gi'e darxi le xance be ko'a pa dakfu 
.i lo nu vimcu le degji pagbu cu mutce spaji sy noi peisku lu .ue sai ga 
mi xamgu se funca gi ti na mutce vlipa li'u .i ko'a fengu krixa gi'e 
troci lo nu darxi sy .i ko'a zmadu lo se kanpe be sy lo ka sutra .i ko'a 
milxe darxi pa janco be sy .i ku'i la'e di'u rinka lo nu sy ze'a na 
kakne lo nu ganse tu'a pa birka

ni'o sy ca'o troci co gasnu lo nu ko'a gunta sy po'o .i sy milxe zgana 
lo nu vy co'a troci lo nu sidju .i ku'i ba zi bo le jatna be le ritli 
remna cu ze'o bajra .i se mu'i bo vy celgunta le jatna .i ku'i na catra 
.i ca'o bo sy plipe lo diklo poi jibni gi'e na cnita vau le xanxe be 
ko'a .i fi'o suksa bo sy tirna lo tcetce cladu sance le sance be tu'a lo 
jibni be cy .i sy ze'i krici lo du'u da gasnu lo nu de lindi la .stefen. 
.i se ki'u bo sy viska catlu fa'a cy .i sy zgana lo du'u cy pu zi pilno 
lo xumjimcelxa'i poi zmadu ro xumjimcelxa'i poi sy pu viska vau lo ka 
barda .i le xarci cu zmadu cy lo ka clani

ni'o sy za'u re'u co'a carna fi le rokci ca lo nu sy tirna lu doi sy ko 
plipe li'u .i ku'i sy na bredi gi'e milxe cfipu .i ba zi bo sy vofli .i 
ba zi bo sy lifri lo nu lo temci flecu cu susti

--
You received this message because you are subscribed to the Google Groups "lojban" group.
To unsubscribe from this group and stop receiving emails from it, send an email to lojban+unsubscribe@googlegroups.com.
To post to this group, send email to lojban@googlegroups.com.
Visit this group at https://groups.google.com/group/lojban.
For more options, visit https://groups.google.com/d/optout.