Re: [lojban] lo tcidu bende pe la nicte cadzu — 88moi lo spisa

[selpahi <seladwa@gmx.de>]

ni'o sy pu ca'o ze'a jarco lo ka mutce se spaji .i ry cusku lu ma nabmi 
doi .susan. li'u .i sy cusku lu lu ca le re no moi purlamji li'u .ue sai 
.i doi .kim. mi zgana lo du'u do cabyku'e lo nanca be li ji'i re mu li'u 
ju'e lu .u'i ki'e sai .susan. mi nanca li xa re li'u ju'e lu .ue sai doi 
vy do nanca ma li'u ju'e lu li bi ze .u'i li'u .i sy ze'i pensi to le 
drata cu mutce cisma toi gi'e cusku lu .i ku'i do pu cusku lo du'u la 
.djen. bu'u gunka pu ro da .i ji'a dy na blupinxe li'u .i ry cusku lu dy 
na ba'e ca blupinxe .i ku'i pu blupinxe .i dy nanca li pa no ze li'u 
ju'e lu .i ji'a le bruna be do citno simlu li'u .i vy co'u cisma gi'e 
cusku lu la .brai,an. cu djica lo nu citno binxo .i by pu pleji le nu 
jmive li'u .i sy jgari le xance be vy gi'e cusku lu .u'u sai li'u

ni'o vy cmalu cisma gi'e cusku lu mi na pu te preti le se djica .i xu do 
morji le nanmu li'u .i sy cusku lu so'i citno nanmu pu jibni le skina 
dinju li'u ju'e lu da poi do cindji catlu li'u ju'e lu .u'i mi pu cindji 
catlu so'i nanmu .e so'o ninmu .i na sidju li'u ju'e lu .u'i da poi 
ponse lo pelxu je blabi kerfa .e lo xekri palku li'u ju'e lu go'i li'u 
ju'e lu do ze'a cindji catlu le nanmu .i ma mukti lo nu do na cpedu lo 
nu senvi penmi li'u

ni'o sy milxe jenca .i ba za bo cusku lu pa mai mi na djuno lo du'u do 
na fengu li'u ju'e lu mi jimpe .i do ba djuno li'u ju'e lu go'i .i re 
mai mi jikca terpa .i mi na certu lo nu cpedu lo simsa li'u ju'e lu .ue 
sai do barja selfu li'u ju'e lu .i se ki'u bo mi tcetce certu lo nu 
rivbi lo cindji nanmu .i na srana li'u ju'e lu je'e li'u ju'e lu ci mai 
mi terpa lo nu mi se snuti xrani ca lo nu gletu kei ri'a lo nu mi 
blupinxe tsali li'u

--
You received this message because you are subscribed to the Google Groups "lojban" group.
To unsubscribe from this group and stop receiving emails from it, send an email to lojban+unsubscribe@googlegroups.com.
To post to this group, send email to lojban@googlegroups.com.
Visit this group at https://groups.google.com/group/lojban.
For more options, visit https://groups.google.com/d/optout.