Re: [bpfk] lo smuni be zo kau

On Mon, Feb 15, 2016 at 3:17 PM, Ilmen <ilmen.pokebip@gmail.com> wrote:

je'e ki'e sanji gasnu mi fliba je'u lo ka pensi tu'a zo ji'isre jo'u zo kau .i ku'i lo vrici mupli poi do cusku cu fricysi'u lo ka ma kau smuni lu ma kau li'u .i pe'i pei na cumki fa lo nu smuvanbi claxu fanva lu ma kau li'u lo lojyskebau ku mu'a

pe'i na fricysi'u lo ka ma kau smuni .i lo briju'a poi vasru zo kau cu ro roi jai cumki fai lo ka se basti lo danfu briju'a .i ku'i mi na djuno lo du'u ta'i ma kau fanva lo preti lo lojyskebau .i lo danfu na jai sarcu fai lo ka fatci .i lo du'u xu kau lo danfu cu fatci ja'a fancu lo du'u xusra ma kau dy .i va'o lo nu cusku lu djuno ko'a li'u cu sruma lo du'u ko'a fatci .i va'o lo nu cusku lu ji'isre ko'a li'u cu sruma lo du'u ko'a na fatci .i va'o lo nu cusku lu birti ko'a li'u cu na sruma lo du'u ko'a fatci .i ko'a ka'e fadni bridi gi'a danfu lo nalsirji preti

.i mi djuno lo du'u la djan cu citka ma kau
.i mi djuno lo du'u la .alis cu citka ma kau
.i mi djuno lo ka ce'u citka ma kau kei la djan
.i mi djuno lo ka ce'u citka ma kau kei la .alis
.i la djan cu frica la .alis lo ka ce'u citka ma kau
.i .i'a lu ma kau li'u cu simsa zo ce'u lo ka sinxa lo kunti ke sumti stuzi .i ku'i zo kau jarco lo du'u ma kau fancu ma kau .i lo re stuzi cu na dunsi'u .i lu mi do dunli lo ka ce'u ma kau nelci li'u na selsmudu'i lu mi do dunli lo ka ma kau ce'u nelci .i mutce frica

frica ĭe sai .i da'i va'o lo zo ka .astrato zo'u lu ma kau li'u sinxa lo steci te sumti .i lo nu lo mi prosa pe zo kau cu selpau lo simsa be lu da'i lu ma kau li'u smudu'i zo ce'u li'u zo'u na'e satci ve skicu gi'e to'e drani lo ka nibli lo du'u ka'e ku basygau lu ce'u li'u ro lu ma kau li'u pe lo zo ka .astrato ja'e no nu smuni cenba .i .ei mi pu na pilno zo selsmudu'i

.ei pe'i lo ka zei sumti cu ro roi jai cumki fai lo ka vimcu .i mu'a (to mi pilno lu jai nai li'u lo nu sinxa lo dukti be zo jai .i ku'i stidi lo drata va'o lo nu na pluka toi) lu la djan cu frica la .alis lo ka ce'u citka ma kau li'u ka'e se basti lu lo danfu be la'e lu ko'a citka ma li'u pe va'o lo nu ko'a du la djan cu jai nai frica lo danfu be la'e lu ko'a citka ma li'u pe va'o lo nu ko'a du la alis .i lu mi djuno lo ka ce'u citka ma kau kei la djan li'u ka'e se basti lu mi djuno lo danfu be la'e lu ko'a citka ma li'u pe va'o lo nu ko'a du la djan

.i na lojyskebau .i ku'i pe'i jarco lo nu ro te pilno be zo kau cu saxysi'u

ni'o ci mai lo nu pilno zo kau lo ka jadni lo ralju bridi cu na se casnu .i mu'a lu .e'a do zukte ma kau li'u .a lu .ai mi ba pinxe lo sodva .a ma kau li'u

ĭe .i mi na jinvi da lo nu zo kau pagbu lo ralju bridi sinxa .i ru'a lu mi klama ma kau li'u smudu'i lu mi klama lo se klama be mi li'u .a su'o simsa .i ku'i na birti

ie .i xusra lo platitude.i ku'i ji'a ka'e plixau va'o lo nu lo ralju bridi na se xusra

mu'o mi'e xorxes