[bpfk] lu .i broda li'u jo'u lo si'o .opservative

[Ilmen <ilmen.pokebip@gmail.com>]

coi lo ĭo ro cmima be BPFK

ca'e srana lu .i broda li'u jo'u lo si'o za'e .opservative
to ca'e lo ka .opservative cu ka to'u bridi gi'e se jicmu lo se ganse .e 
nai lo drata se djuno ku mu'a toi

ni'o lo goi ko'a cabycedra ke jbobau nu baupli poi mi ganse zo'u na'o ku 
lu .i broda li'u smudu'i ge lu .i zo'e broda li'u jo'u lu .i ju'a broda 
li'u gi nai lu .i za'a broda li'u .i ku'i na sarxe lo jbobau poi CLL 
skicu ku noi tu'a ke'a nibli ĭe nai pei lo du'u lu .i broda li'u ja'a 
smudu'i lu .i za'a broda li'u to si'o .opservative toi .i ku'i lo ko'a 
baupli ja'a kakne lo ka cusku lo .opservative jufra .i ta'i bo jmina zo 
za'a lo jufra .i ja'o ĭe nai pei lo si'o .opservative na ba'o cliva pe'a 
lo ko'a jbobau klesi

ni'o ku'i ji'a cumki fa lo nu su'o da te frica lo smuni be zo za'a lo 
.opservative smuni gi'e na jai se sanji mi .i .o'a cu'i va'o lo nu da'i 
do sanji su'o nu bi'u nai da te frica zo'u .e'o do mi ctuca

ni'o ji'i pi ro lo jbobau nu pilno poi mi ganse zo'u lu .i broda li'u na 
jai nibli lo du'u .opservative .i ju'o ja'a cumki fa lo nu mi fliba lo 
ka ganse tu'a lo drata je cabycedra nu su'oi so'o da cafne pilno lo ja'a 
sarxe be lo CLL nu lu .i broda li'u .opservative jufra .i va'o lo nu 
da'i su'o do sanji su'o nu bi'u nai mi ganse fliba zo'u .e'o sajgau mi

ni'o ku'i ji'a mi ka'e pensi su'o racli krinu be lo nu da'i lo jbopre cu 
zmanei lo nu lu .i broda li'u na .observative jai nibli .i me lo se go'i 
fa lo nu lo selbri poi tersu'imei li pa gi'e se menre lo si'o sipna ku 
mu'a zo'u da'i fanza ba'a fa lo ka ge na ka'e vimcu lo sumti sinxa va'o 
lo nu smuvanbi li'armi gi va'o lo nu .opservative smuni na'e djica ku ro 
roi bi'ai nitcu lo ka cusku lo simsa be lu .i zo'e sipna li'u jo'u lu .i 
fa sipna li'u jo'u lu .i ju'a sipna li'u .i ji'a cizra fa lo nu da'i ge 
lu .i ko'a sipna li'u zo'u zo ju'a zilmipri pagbu to za'e .implisite toi 
gi ku'i lu .i sipna fa ko'a li'u zo'u ba'e zo za'a zilmipri pagbu co 
na'e simlu lo ka sarxysi'u
.i ji'a va'o so'i da zabna fa lo nu ka'e ku lo selbri sinxa cu jufra 
lidne to mu'a lu cumki fa lo nu broda li'u toi fau nai lo nu nitcu tu'a 
zo ju'a .i jalge fa lo nu valsi porsi zifre zmadu ĭe nai pei

ni'o mi pacna lo du'u su'o da tadji lo ka gau ce'u lo fadni nu baupli ku 
lo ca'irselzau jbobau cu di'a sarxe tu'a lo si'o .opservative .i .e'o 
ma'a casnu lo ka'e danfu jo'u lo ka'e nabmi gi'e panpi ji'isku vau ja'e 
.a'o su'o nu su'o da poi danfu zo'u ma'a co'a tugnysi'u tu'a da gi'e 
kansi'u lo ka zanru da

mi'e la .ilmen. mu'o


--
You received this message because you are subscribed to the Google Groups "BPFK" group.
To unsubscribe from this group and stop receiving emails from it, send an email to bpfk-list+unsubscribe@googlegroups.com.
To post to this group, send email to bpfk-list@googlegroups.com.
Visit this group at http://groups.google.com/group/bpfk-list.
For more options, visit https://groups.google.com/d/optout.