[bpfk] zo ‹ri›

[Ilmen <ilmen.pokebip@gmail.com>]

coi ro do

.i .e'u casnu zo ‹ri› fa ma'a

• https://mw.lojban.org/papri/BPFK_Section:_Anaphoric_Pro-sumti#cmavo:_ri_.28KOhA5.29

.i lo cacklu smuvelcki be zo ‹ri› cu nibli lo du'u zo ‹ri› krati lo sumti poi se krati lo sumsni poi mulno gi'e traji lo ka lidne jibni .i ru'a nibli lo du'u «lu xu lo ractu cu se viska la rijykre doi ri (ku sa'a) li'u» zo'u zo ‹ri› krati lo ractu .e nai la rijykre .i da'i sarcu fa lo nu gau ragve zo ‹ku› fa lo cmene sumsni fi zo ‹ri› kei lo nu ri ja'a krati la rijykre ĭe pei

.i mi jo'u la solpa'i jo'u la ŭakci pu za lo jeftu be li so'u cu casnu zo ‹ri› .i mi pu stidi lo du'u javni lo ka se krati zo ‹ri› kei fa ba'e di'e

.i zo ‹ri› goi ko'i krati lo se krati be lo sumsni poi ge ke'a traji lo ka lidne jibni ko'i gi ko'i na pagbu lo smuni stura be ke'a

(to lo zifma'o ja zifyjufpau ka'e fulta pe'a lo midju be lo sumsni fau nai lo nu pagbu lo smuni stura be ri .i mu'a «lu lo pendo ŭa ku gleki li'u» zo'u zo ‹ŭa› na sarcu tu'a lo smuni pe «lu lo pendo ku li'u» gi'e va'i na pinfu pe'a ri toi)

.i pe'i da'i mapti lo nu da'i smudra fa «lu jundi xu fa la rijykre doi ri li'u» .e «lu ca lo cabdei mi penmi la rijykre (to ri slabu xu do toi) li'u» .e lo simsa vu'o noi ke'a zo'u za'a dai lo sumsni pe «lu la rijykre li'u» ca lo nu zo ‹ri› tolcanci cu na'e mulno ki'u lo nu zo ‹ku› na zvati .i ŭa pei

.i .a'o lo mi se stidi cu jmifrili .i .e'o va'o lo nu na go'i cu jungau mi fa do

no'i do'o ma jinvi

mu'o re'i mi'e la .ilmen.

--
You received this message because you are subscribed to the Google Groups "BPFK" group.
To unsubscribe from this group and stop receiving emails from it, send an email to bpfk-list+unsubscribe@googlegroups.com.
To post to this group, send email to bpfk-list@googlegroups.com.
Visit this group at https://groups.google.com/group/bpfk-list.
For more options, visit https://groups.google.com/d/optout.