Re: [lojban-beginners] la tomas. dotco

[selpa'i <seladwa@gmx.de>]

de'i li 1284 bu'u la .xameln. pa nalfadni nanmu cu se viska .i dasni lo 
taxfu poi skari so'i da ku'o gi'e xusra lo du'u ratcu kavbu kei gi'e 
friti lo ka va'o lo nu pleji lo jdini cu gasnu lo nu ro smacu .e ro 
ratcu cu cliva lo tcadu .i la .xameln. ca lo ca cedra cu malricfu lo ka 
xo kau ratcu cu zvati ce'u .i je lo xabju be lo tcadu cu fliba lo ka 
jitro .i se mu'i bo ra fitytu'i lo se friti be lo bi'u nai fange nanmu

.i lo tcadu xabju cu nupre lo ka pleji fi lo bi'u nai nanmu .i je lo 
ratcu kavbu cu cpacu lo ri siltci gi'e gasnu lo nu lo togmo'a cu se 
siclu .i ca bo lo ratcu .e lo smacu cu klama fi lo nenri be lo dinju 
gi'e jmaji lo se zvati be lo nanmu .i ri ca lo nu jinvi lo du'u no ratcu 
za'o nenri lo dinju cu cliva lo tcadu gi'e klama lo nenri be la .vezer. 
(to sa'a rirxe toi) .i ro lo danlu cu jersi gi'e farlu lo djacu gi'e 
mrobi'o .i ku'i lo tcadu xabju ca lo nu lo ratcu ba'o canci cu xenru lo 
ka pu nupre ma kau kei gi'e na dunda su'o jdini lo bi'u nai nanmu .i 
ja'e bo ri fengu gi'e cliva fau lo nu ri badri

.i ku'i ca lo drata djedi ra xrukla fau lo nu dasni lo kalte taxfu .e lo 
xunre mapku gi'e se flira lo jai terpyri'a kei gi'e gasnu ca lo nu ro 
drata cu zvati lo marbi kei lo nu lo ra siltci cu siclu .i ba bo ca lo 
ca krefu ge nai lo ratcu .e lo smacu gi lo verba (to lo nanla .e lo 
nixli toi) poi so'i mei cu klama fa'a lo nanmu .i ri fau lo nu na co'u 
siclu cu klagi'a lo verba pa'o lo tcadu vorme lo brama'a ku noi bu'u 
ke'a lo nanmu .e lo verba cu canci .i 130 verba pu canci .i ri no roi 
di'a se viska su'o drata


--
You received this message because you are subscribed to the Google Groups "Lojban Beginners" group.
To unsubscribe from this group and stop receiving emails from it, send an email to lojban-beginners+unsubscribe@googlegroups.com.
To post to this group, send email to lojban-beginners@googlegroups.com.
Visit this group at http://groups.google.com/group/lojban-beginners.
For more options, visit https://groups.google.com/d/optout.