[lojban] Le Petit Prince - XII

["Jorge Llambias" <jjllambias@hotmail.com>]

ni'o le za'umoi plini cu se xabju lo pixydu'e i le nu vitke cu
tordu gi'eku'i rinka le nu le cmalu noltrube'a cu mutce le ka badri

-- i do va zukte ma --sei ny fi le pixydu'e noi smaji crane loi
kunti botpi e loi culno botpi cu cusku

-- i mi pinxe --sei le pixydu'e fau le nu badri simsa cu spusku

-- i tezu'e ma do pinxe --sei le cmalu noltrube'a cu retsku

-- i tezu'e le nu mi morsi --sei le pixydu'e cu spusku

-- i morsi ma --sei le cmalu noltrube'a noi xa'o kecti py cu retsku

-- i morsi le du'u mi ckeji --sei le pixydu'e fau le nu dizgau le
stedu cu zungi cusku

-- i ckeji ma --sei le cmalu noltrube'a noi djica le nu sidju cu
datni cpedu

-- i ckeji le nu mi pinxe --sei le pixydu'e noi co'a stodi smaji
cu famsku

ni'o le cmalu noltrube'a cu se cfipu cliva

ni'o lu lo'e makcu prenu ja'asai cizra mutce li'u se cusku le
cmalu noltrube'a ri ca le nu litru



_________________________________________________________________
Chat with friends online, try MSN Messenger: http://messenger.msn.com


------------------------ Yahoo! Groups Sponsor ---------------------~-->
Home Selling? Try Us!
http://us.click.yahoo.com/QrPZMC/iTmEAA/MVfIAA/GSaulB/TM
---------------------------------------------------------------------~->

To unsubscribe, send mail to lojban-unsubscribe@onelist.com 

Your use of Yahoo! Groups is subject to http://docs.yahoo.com/info/terms/