Re: re: cecla fanta flalu

["Jorge Llambias" <jjllambias@xxxxxxx.xxxx]

pe'i lo'e jecta cu sarcu xlali i na zasti fa lo tadji be le nu
ganzu lo cecmu be'o poi mleca le ka xlali i lei flalu be fu
le jecta cu xlalymleca lei flalu be fu le tsarai a le ponse be
le vlirai xarci i je'u le citri be lei jecta cu culno lei nu terpa
kujoi lei nu pindi kujoi lei nu prenu catra i ku'i le citri be
lei jecta cu du le citri be lei remna i lei cecmu pe secau
lo jecta na snada le nu rivbi lei di'u xlali i le jecta cu se pilno
gi'enai rinka

ni'o le nu zifre cu xamgu i le nu snura cu xamgu
i su'oroi le nu da zifre cu fapro le nu de snura i lei cecmu cu
te flalu le nu makau te sepli le nu da zifre kei le nu de snura
i pe'i le nu so'i de snura le nu te renro lo danti cu vajni zmadu
le nu so'u da zifre le nu ponse lo xarci cecla iseki'ubo
mi zanru lei flalu be le nu fanta le nu cecla ponse

co'o mi'e xorxes