le petit prince - II

["Jorge Llambias" <jjllambias@hotmail.com>]

remo'o

ni'o taiku mi ze'a nonkansa secau lo'e prenu poi mi ke'a ka'e fatci
tavla ku'o co'u lo nu pu spofu bu'u le kutytu'a po'u la sa'aras za
lo nanca be li xa i da ba'o porpi ne'i le mi matra i mi kansa genai
lo mi'icre ginai lo se vinji prenu iseki'ubo mi pu'o bredi le nu
nonkansa troci le nu snada lo nandu nu cikre i le cuntu cu srana le
du'u mi za'o jmive gi'ikau mrobi'o i mi ponse lo djacu poi ka'e
pinxe ze'a lo djedi be li su'ebi po'o

ni'o ca le pamoi vanci mi sipna vu lo minli be li ki'o to'o lo se
xabju tumla i mi zmadu lo'e porpi bloti prenu noi cpana lo fultapla
bu'u le xamsi midju ku'o le ka sepli iseki'ubo do ka'e se xanri le
nu mi se spaji le nu ca le co'a donri lo xajmi ke cmalu voksa mi
cikygau i vy cusku di'e

-- i e'o ko pirfi'i lo lanpanzi seva'u mi

-- i ki'a

-- i ko pirfi'i lo lanpanzi seva'u mi

ni'o mi co'a sanli fi lei mi janfu tai le nu da'i mi se lindi i mi
carmi mosra fi lei mi kanla i mi carmi catlu i mi viska lo tolfadni
ke cmalu prenu noi junri lanli mi i di'e xagrai pixra be py be'o
noi mi baza snada le nu finti ke'a i ku'i li'a le mi pixra cu mutce
mleca le se pixra le ka se manci i mi na fuzme i mi se tolxlu lo'e
makcu prenu le nu pirlarcu se jibri kei ca le nu mi nanca li xa kei
gi'enai cilre fi le nu pirfi'i na'e bo lo sincrboa poi kalri gi'a
ganlo

ni'o mi catlu le tolcanci fau le nu le mi kanla cu barda cukla
seja'e le nu spaji i ko na tolmorji le du'u mi zvati vu lo minli be
li ki'o to'o lo se xabju tumla i ku'i le cmalu prenu na simlu le ka
farcri gi'a traji tatpi gi'a traji xagji gi'a traji taske gi'a
traji terpa i py nasai simlu le ka verba co farcri le midju be le
kutytu'a vu lo minli be li ki'o to'o lo se xabju tumla i ca le nu uo
mi snada le nu tavla kei mi di'e py cusku

-- i y do va mo

i py mutce tolxanka je junri ke krefu cusku di'e

-- i e'o ko pirfi'i lo lanpanzi seva'u mi

ni'o ca le nu lo cizra cu dukse le ka se manci cu na darsi le nu
toltinbe i simlu le ka tolracli kei vu lo minli be li ki'o to'o lo
se xabju tunla fau le nu morsi ckape isemu'inaibo mi tolse'a lo
pelji boxfo e lo penbi le mi daski i ku'i mi morji le du'u mi ralju
cilre fi le tedyske e le cirske e le cmaci e le gerna kei gi'e
cusku fi le cmalu prenu to fau le nu mi milxe se fanza toi fe le
sedu'u mi na kakne le nu pirfi'i i py spuda cusku di'e

-- i na vajni i ko pirfi'i lo lanpanzi seva'u mi

ni'o mi pu noroi pirfi'i lo lanpanzi i seki'ubo mi krefu finti
seva'u py pa le re po'o pixra poi mi kakne i le me le ganlo
sincrboa moi i mi traji se spaji le nu tirna le nu le cmalu prenu
cu spuda cusku di'e

-- i na'i i mi na djica lo me lo xanto poi nenri lo sincrboa moi i
lo'e sincrboa cu mutce le ka ckape ije lo'e xanto cu mutce le ka
fanza i le mi zdani cu cmalu mutce i mi nitcu lo'e lanpanzi i ko
pirfi'i lo lanpanzi seva'u mi

ibabo mi pirfi'i

                          <pixra>

ni'o py jundi catlu i di'e

-- i na'i i ta mutce le ka bilma i ko finti lo drata

i mi pirfi'i

                          <pixra>

i le mi pendo cu xendo cisma fau le nu fraxu

-- i za'asaidai ta lanpanzi nagi'e lanynakni i ta se jirna

isemu'ibo mi krefu finti le mi pixra

                           <pixra>

i ku'i na se zanru tai tu'a lei se jersi

-- i ta dukse le ka tolci'o i mi djica lo'e lanpanzi poi ba ze'u
jmive

ni'obabo secau le nunsurla mi fau le nu sutydji le nu co'a
toljajgau le mi matra cu malfi'i le di'e pixra

                           <pixra>

i mi bacru di'e

-- i ta tanxe i le lanpanzi poi do djica cu nenri

ni'o ki'u mi mutce le ka se spaji le nu viska le nu le flira be
le mi citno pajni cu se gusni

-- i ta prane le ka mi djica i pe'ipei le vi lanpanzi cu nitcu
piso'i srasu

-- i ki'u ma

-- i ki'u le nu le mi zdani cu cmalu mutce

-- i ju'o banzu i mi dunda lo cmalu mutce lanpanzi do

ni'o py sa'orgau le stedu fa'a le pixra

-- i na tai cmalu i ua ta sipna

ni'o tai la'e di'u mi co'a se slabu le cmalu noltrube'a

---------------

mu'o mi'e xorxes



_________________________________________________________________
Join the world?s largest e-mail service with MSN Hotmail. 
http://www.hotmail.com