Re: jbopemci

["Jorge J. Llambías" <jorge@INTERMEDIA.COM.AR>]

>coi xorxes.
>ta'u mi zo selbi'i u pilno lenu skicu da po'u lo'i prenu sekai leka lojbo
>jbini be ce'u be'o ju cmima ju tavla .i le no'e girzu na'o penmi nagi'e
>tolkansa .i ku'i la lojban. pu'i zasti setai lo jbini beda

i ki'anai i mi se cfipu le nu do ciska lu ko'a goi lo prenu cu lojbo selbi'i
li'u i le selbi'i cu prenu nagi'e prenu so'omei i pe'i do skudji lu ko'a
goi lo prenu cu lojbo selbi'i cmima li'u mu'a  i ji'a ta'o paunai le no'e
girzu ma na'o penmi nagi'e tolkansa  i sa'e le no'e girzu na'o pensi'u
nagi'e tolkansi'u i u'i mi zanru le nu zengau lei lojbo valsi le ka pixra
smuni i ku'i mi xarnu le nu sarji lei terbri stura

>.ino'i lepu'u zi'o galfi lo pulci ce'e lo tarci pe'e je lo mintu jutsi ce'e
>lo frica jutsi kei cu bancu lo kambangu .i go'i loka remna .i na drata
>lepu'u ninpra lo sidbo .e lo nuntra vau da'icu'i

i ge le nu galfi lo pulce lo tarci gi le nu galfi lo mudri lo jubme cu
ka'e se skicu bau i le pamoi o le remoi cu bancu le kambau
i le pamoi cu bancu le nu lo'e remna ka'e gasnu i ku'i na bancu
le nu lo'e remna ka'e se xanri iseni'ibo na bancu le ka remna
i lei remna ta'e ninpra loi sidbo e loi nuntra i le nu go'i cu mutce
le ka remna

>.ino'i .ieru'e lu tcana be lo pemci li'u to xu fampau toi zo'u .e'u linpau
>pe'a be lo pemci be'o jake mijykambra snarau ke'e jake pamei slinunmu'u
>ke'e jake fu'epe'a xemcpare selstapa fu'o ke'e ja vaxyvelru'e .i'e

i so'i cumki

>.i lu famyma'o li'u tcita ledi'e pemci .itu'e
>
> fu'epe'a kandi co
> jbini le'i solri
> fagri .i turni
> tu'a lo canga rilti
>
> .i mecycai co selcta
> tega'a lo xekyblaci
> .i selbilma fi da poi
> ma'a fi ke'a
>
> na djuno fu'o .i fu'e-
> ti'e lo'e cpedu
> be file turni be lo'i
> xekcpi ka'e
>
> te danfu lo xekcpi
> po'o fu'o .i le
> sumne pe le puzi
> selkatna srasu
>
> ku'o ve'i dandu
> tu'i le vacri
> gi'ebabo canci
> .i di'u jai pe'a fai
>
> lo famyma'o
>
>tu'u .i lu slojoinri'o magvla li'u tcita ledi'e pemci .i tu'e
>
> prami xabji fami le'a bi'i
> gi lenu di'i kansa
> gi lenu ru'i kansa .i mi
> djavau lumci prije
> .i ritli kreka'a zau
> lo ninmu pe sekai le
> pevytcati
>
>tu'u

i lu gapci tarmi li'u tcita di'e i tu'e

i e'u sisku su'o smacpi
lei sa'acpi i e'e kalte
fi le nu punji fi lo tanxe
i e'a tirna

i e'u tolcri lo klifi'e
lei skafi'e i e'e kavbu
fi lo djacu culno baktu
i e'a catlu

i e'u crepu lo pancau xrula
lei panxrula i e'e setca
le stani fi lo botpi
i e'a sumne

i xu snada i ei snada
i e'o curmi le nu ganse
i le smatsa le klicai le pancaucfu
zo'u doi selpa'i le tolzvati

tu'u

>.i no'i ckafybarja zo'u .ia ko'a goi lo xanri be ko'e goi so'o prenu
>cu zmadu lo ca'a selzva le kampu kamxanri gi'e mlecu vo'e le steci kamymo'i
>.i le fatci po'u ledu'u lejei ko'a kei ka'enai selcipra kei ku'o na selsmu
>ledu'u ko'a na mintu ko'e vau li'anai

i ie je'u le du'u ka'enai cipra da na nibli le du'u da jitfa i mi tolbirti
caku le du'u xukau le kampu xanri cu zmadu le mi pu se pensi
i xu ca le nu tcidu lo ckafybarja lisri kei le vanbi cu slabu i cumki

>ni'o lu donri cragusni li'u tcita ledi'e pemci .itu'e
>
> za'e pilda flira
> .i .iu manku kerfa
> .i muvmorna co dilsmi
> ctino .i cersolri
> je co'u lirbla .i
> co'a kafnunzukte
>
> .ije normorji co selsne
> bopuzi .i cacmorna
> co karcytro seka'a
> zu'i .ije ru'inai
> nu selxanri ledu'u
> jbini fa lo jbosmu
>
> le'i cragusni poi za'o
> teryru'e .i cimklaji
> gusminra .i dilsolri
> je .a'e pelzi'u
>
> .i ko'i retpei ledu'u
> pujaca bacru makau
> fa lei drata selbi'i
> sera'a gale dei nunkla
> gi le pemci pe dei
>
>tu'u

i uinai lei drata selbi'icmi pujaca te pinka
di'u e la'e di'u noda ki'u le nu oi pe'i sy na tcidu
i a'o bazi cenba

>ni'o caku le crisa co'u camgla .i bazi cfari le ze'a nu jarco lemi
>cintylarcu pixra le selgubni .i .ai fe ra viska tu'a le xunre je blanu
>kalblaci .i .aucu'i vecnu .i .o'a ra'u jarco

i cabu'uku le dunra co'u lekcai  i a'u xu pare'u jarco i xu do pu
jarco ca loi drata nanca

>.i ta'o zo pilda cu valsi zo kadjavblabi le saujbo co'o mi'e maikl.

co'o mi'e xorxes