Re: Always the same?

["Jorge J. Llambías" <jorge@intermedia.com.ar>]

la robin cusku di'e

>zo'o .aucainai .i pe'i lenu la maikrysaft. sarji la lojban. ka'e rinka lenu
lei
>prenu .e lei skami cu frili si'uxlajmi

i lu lei prenu e lei skami cu frili si'urxlajmi li'u cu smuni mintu
lu lei prenu cu frili si'urxlajmi ije lei skami cu frili si'urxlajmi li'u
i pe'i do skudji lu lei prenu ku joi lei skami cu frili si'urxlajmi li'u

i ta'o mi zmanei zo xlajmisi'u zo si'urxlajmi ki'u le du'u lujvo
le du'u simxu le ka xlajmi

>le ninmu: .u'e.au melbi nebja'i
>le nanmu: mi sezynelci le smoka jinsru .e le tatyta'u tu'i le tu zarci

i ki'a sezynelci i di'u se smuni le du'u le nanmu cu nelci ri
i e'u lu mi zu'unai nelci le smoka jinsru e le tatyta'u li'u

i ji'a lu mi nelci da tu'i de li'u cu se smuni le du'u de stuzi
le nu mi nelci da kei i na se smuni le du'u de stuzi da

>le skami pe la maikrysaft: le nebja'i .e le tatyta'u cu si'unalmapti .i
pe'u ko
>terve'u le samselpa me'e la'o copin.plys

i si'a lu le nebja'i ku ba'e joi le tatyta'u cu simxu li'u i lu ko terve'u
le samselpla po'u la copin plys li'u i lu copin plys li'u na cmene
le nu terve'u

i ni'o le do lojbo selci'a cu so'amei drani doi robin i a'o lei mi
pinka be lei tcila cu sidju gi'enai fanza

co'o mi'e xorxes