Re: xa'unro'a xize

["Jorge J. Llambías" <jorge@intermedia.com.ar>]

i cinri fa lei pinka be le pazemoi ctona'a zgike bei la maikl
i mi lifri lo frica ca le nu tirna lo zgike i ta'e na pensygau mi 
le cedra pe le nu le zgike cu se finti i lo zgike ka'e stidi 
fi le pruxi fe le ka gleki a le ka badri a le ka fengu a le ka 
surla a ji'a le ka clite a lo so'imei drata i ku'i pe'i le se stidi
cu se krasi le zgike kujoi le tirna enai le finti enai le vanbi
be le finti i mi krici le du'u lo'e larcu dacti cu krati ji'o sai le 
zgana gi'enai so'eroi ve cusku le zgana da le finti i seki'ubo 
le du'u xukau lo lardai ca fatci ve skicu cu se jdice le cabna 
zgana i cumki fa le nu le se skicu poi cabna na mintu 
le se skicu poi le finti pu troci a le se skicu poi lei pu zgana 
cu cpacu isejubo ie la'a ma'a se tcica fi so'e le se krici

co'o mi'e xorxes