lo krasi be zoi gy. Tic-Tac-Toe gy. (xajmi)

[Michael Turniansky <mturniansky@gmail.com>]

lo krasi be zoi gy. Tic-Tac-Toe gy. 

.i   selcku fi la glavar.sovysed noi balkulctu fo loi citri be loi selkei .e loi se ci'erkei be'o fi'o ckule la jbogu'e balcu'e

ni'o so'i da pu selci'a sera'a le slabu se ci'erkei poi se cmene lu linji cimei li'u .i ro verba cu se slabu ri .i lo skami cu puzu cilre fi lo tadji be lo nu jinga fo ly.cimy
.iku'i lo cmene be ri cu jai cfipu so'a circre .i le lojbo cmene na go'i .ijebo le brito cmene no'u zoi  by. Naughts and Crosses by. goi ko'a zi'e poi se smuni lu lu'e nobu joi lu'e xy.bu li'u  na go'i .i ko'a cu jai se logji gi'e frili .i ku'i lo mergu'e cmene no'u zoi my. Tic-Tac-Toe my. ckaji lo ka ze'u cfipu lo certu .i ko catlu  la'e mu'a lu srana lo se ci'erkei  poi se kelci sepi'o lo kurfa foldi li'u poi finti la cmaben.cirbeb ku'o bu'u lo pacixamoi be lo papri 

ni'o ta'i lo nandu je clatei nu gunka kei  mi ga'inai cu facki tu'a le danfu .i zoi my. Tic-Tac-Toe .my cu fu'ivla .i le merko cu terbe'i ri lo dzena lojbo natmi .i le valsi cu krasi srana lo mutce drata se ci'erkei .i la tictacto'e pu se ci'erkei co nunytcica  pa'a la ticysku cu'arkubli .i ca lo nu pa kelci cu birti lo du'u lo drata cu ticysku kei kei ra cu krixa lu tcica tance .i to'e go'i li'u .i ja'ebo lo se ci'erkei cu se cmene zo tictacto'e .i lo tadji be lo nu le cmene cu farvi lo tcita be lo drata cu ca'o te djuno fi no de


                           --gejyspa