[Date Prev][Date Next][Thread Prev][Thread Next][Date Index][Thread Index]
Re: [lojban] Balningau: The Great Update
la .xorxes. cu cusku di'e
.i mi do tugni .i nandu fa lo nu jimpe lo du'u ki'u ma kau ge zu'u lo
bolci .e lo kojna .e lo baktu cu se jinzi lo ka marji gi zu'u nai lo
boxna .e lo balre .e lo vasru na co'e .i ku'i lo manri te sumti .e lo
vanbi te sumti cu zmadu fi lo ka fanza mi
ie .i fanza mi ji'a .i zo pluja jo'u zo sampu vu'o noi dukti simxu zi'e
noi ku'i lo ke'a tersu'i stura cu ba'e *na'e* panrysi'u cu misno mupli
co mabla .i pe'i fa'u gi zo va'o gi zo ma'i cu ro roi banzu .i .a'o lo
nu vimcu cu fasnu...
ni'o .a'o su'o drata ba zi stidi de .i lo nu darlu lo na'e srana cu
xamgu ma'a no da (to mi zo'u pe'i lo ci moi te sumti be zo xamgu cu
panra lo re moi pe zo drani ge'u .a lo ci moi pe zo mapti toi) .u'i
je'e .i zo mansa .e zo vajni .e zo cfipu .e zo cizra .e zo xajmi .e zo
fange .e zo zdile .e zo trina .e zo .melbi .e zo cnino .e zo slabu .e zo
dicra .e zo zunti cu mintu fi lo ka tersu'i stura .i ku'i ki'u ma zo
cinri .e zo misno .e zo dirba .e zo ckape .e so'o drata na go'i
cinri preti .i li'a mi na djuno .i je nai mi kanpe lo nu lo ve ciksi be
fo lo gimfi'i cu mansa mi .i fanza milxe fa lo nu zo bebna mu'a na se
panra zo fenki (to lo gimste cu xusra toi) .i ki'u ma ge lo fenki cu
fasnu gi lo bebna cu prenu .i li'a so'i da cusku lo simsa be lu do fenki
li'u .i jarco lo nu la'a su'o so'o jbopre cu zmanei lo stura poi panra
zo bebna .i ji'a lo ka bixygau lo vasru be lo ka-zei-bridi lo
nu-zei-bridi cu frili fi'o mupli lu ko'a nu do fenki li'u .i ku'i lo
dukti noi ka bixygau lo nu-zei-bridi lo ka-zei-bridi cu nandu gi'a juxre
(to mupli fa lu ko'a pagzu'e lo fenki li'u .e ji'a ku'i lu ko'a jai
fenki fai ko'e li'u toi) .i .oi zo juxre ji'a mupli .i ku'i mapti lo
smuni .i zo juxre cu juxre valsi zo'o
ni'o ja'o su'o ci mei fa lo na'e se nelci klesi .i .a'u ma poi drata cu
fanza .i lo jutsi te sumti cu na'e sarcu gi'e ku'i simlu lo ka vajni fi
lo lojbo citri .i ku'i simsa lo marji te sumti lo ka ro roi ka'e cusku
lu ti mlatu gi'e jutlei la .siiam. li'u .i na birti
mi'e la selpa'i mu'o
--
You received this message because you are subscribed to the Google Groups "lojban" group.
To unsubscribe from this group and stop receiving emails from it, send an email to lojban+unsubscribe@googlegroups.com.
To post to this group, send email to lojban@googlegroups.com.
Visit this group at http://groups.google.com/group/lojban.
For more options, visit https://groups.google.com/d/optout.