Re: [lojban] CMK

On Tue, Mar 3, 2015 at 4:00 PM, Jorge Llambías <jjllambias@gmail.com> wrote:

On Sun, Mar 1, 2015 at 11:09 PM, Stela Selckiku <selckiku@gmail.com> wrote:

.i la cnima'okamni goi CMK cu ca'e zasti .i CMK na troci lo barda be fi'o simsa lo seltoi be BPFK .i CMK troci ca'e .ai lo nu ciksi lo cnima'o po'o .i cmalu nu gasnu

.i mi se cinri .i pa mai ma cnima'o .i li'a na ku ro cmavo be lo selma'o be ui cu se pilno fi lo ka jarco lo ka cinmo

je'e .i mi na'e za'e li'anmo .i li'a .ie na'e me'oi "emotion" .i ku'i .ia ru'e zo cinmo srana lo ji'a si'o me'oi "attitude" .i na'e steci .au mutce fa lo su'a gismu .i su'a nai zo cinmo po'o laldo catnyselzau gismu gi'e srana lo simsa .i ku'i je'u lo valsi na .e lo sidbo cu vajni .i .o'o lo drata cu cmene CMK

.i ji'a la'a na ku ro cmavo poi ka'e se pilno fi lo ka jarco lo ka cinmo cu cmavo lo selma'o be zo ui .i ku'i zo cnima'o ka'e cmene lo sema'o va'o ji'a sai lo nu na mulno lo ka satci lo ka ve skicu .i pau CMK se cuntu lo nu ciksi lo cinmo po'o cmavo ji ro cmavo be lo selma'o be zo ui

.a'i ro'e .i troci lo nu za'e bauzba .i frica lo fadni tcini .i da'i mu'a lo prenu cu finti lo cnino selma'o poi simsa ma'oi UI .i ko li'anmo lo nu CMK selci'i .i lo cinri be CMK cu srana lo sidbo .e nai lo gerna steci ku po'o .i ku'i ra'u lo cmavo be ma'oi UI ca terta'a .i ji'a zo sei terta'a (to xanri mi fa lo nu zasti fa lo zo sei kamni poi casnu zo sei po'o .i da'i sai la sei zo sei srana se'u kamni cu cinri sai! gi'u plixautce co'e .i ko mi jungau doi da'i za'e junrydji toi)

.i sa'e tavla .ai fi lo nu lo'e lobypli goi ko'i cu pilno lo jbovla lo nu xusra lo du'u lo bridi cu mo kau ko'i .i lo lunbe sa'e nai bridi zo'u fo'i xusra mo'a da .i lo nu terpli ciksi cu sarcu lo nu ko'i vlipa xusra .i ko'i cusku lu mi klama lo zarci li'u mu'a (to misno mupli (to mi na'e pilno zo le te zu'e lo nu lo do kanla cu na'e fagri pe'a toi) toi) .i no'e xusra lo du'u ko'i klama lo zarci .i ju'o cu'i te lisri .i ju'o cu'i mupli .i zo mu'a mu'a plixau ko'i .i srana lo pe'i selcni .i srana lo sa'e ka mu'anmo .i ko'i mo pau nai lo su'u mi klama lo zarci .i mu'anmo .i lu mi klama lo zarci li'u se jinzi lo ka srana lo sucta po'o .i lu mi klama lo zarci mu'a li'u ka'e se pilno fi lo zmadu vlipa nu xusra .i lo cusku be lu mi klama lo zarci mu'a li'u cu xusra lo du'u vo'a ckini lo selsku lo ka mu'anmo .i lo jufra cu fu'e pe'a cliva lo kensa lo cusku xe ka'a zo mu'a fu'o

.i CMK tavla .ai fi lo si'o za'e kesli'a pe'a .ua pei

.i se ju va'o lo nu lo velcki cu zabna kei mi ka'e pilno vy lo ka ningau je matyzengau lo ve skicu pe la jvovlaste

.a'o sai .i .a'o sai plixau fi lo nu tordu velcki .i ku'i no'e troci lo nu finti lo tordu .i troci lo nu satci .i clani satci .i .ai rapli li rau fa lo nu tavla fi zo .ui .i li'a smimli lo nu cusku lu mi gleki li'u .i ku'i xu nai fricymli .i .ai rapli li so'i fa lo nu casnu .i lo nu xusra lo du'u zo .ui cu srana lo si'o gleki cu drani gi'e na'e mutce pe'i lo ka te prali .i zo .ui jmivymli .i ku'i .au jmivytce .i xu .a'o frica lo nu cusku zo'oi :-) .i condi pe'a tumfakli'u pe'a vau .au .i na'e cafne fa lo nu lo cnino cu cnima'o .i zo .oi'o ninmli .i mi pu zi finti zo .ii'i noi co'e zo'oi "excited" ku'o pei .i ku'i ra'u CMK masno rapli tavla .ai fi lo laldo .i zo .i'u zo'u .i'unmo .ai .i zo .o'e zo'u .o'enmo

mu'o mi'e xorxes

mu'o jbobo

mi'e .telselkik.