Re: [lojban] lo tcidu bende pe la nicte cadzu — 57moi lo spisa

[selpahi <seladwa@gmx.de>]

ni'o vo pi re mo'o nu casnu gi'e krixa

.i la .susan. cusku lu pe'u .stefen. ko ciksi lo krinu be lo nu mi joi 
do ku? po'o? cu vitke lo pulji li'u ju'e lu .y. mi vitke ki'u lo nu mi 
certu lo nu terpa co gasnu .i mi po'o sarcu .i do kansa mi ki'u lo nu 
la'a do cilre li'u ju'e lu cilre fi ma li'u ju'e lu lo tadji be lo nu 
terpa co gasnu lo remna kei .e lo makfa .e lo du'u lo remna na nelci 
ma'a li'u ju'e lu so'a remna na sanji ma'a li'u ju'u lu go'i .i ku'i 
so'a remna poi ca'a sanji ma'a cu xebni gi'e se terpa vau ma'a li'u

ni'o la .susan. cu jgari le vrogai be lo pulji dinju se va'u la .stefen. 
 noi dasni lo kagni taxfu poi sy na pu viska ku'o zi'e noi cusku lo se 
du'u ckire .i cy co'a gleki je nai xendo cisma gi'e klama le rinsa gi'e 
cusku to ca'o cisma toi lu mi'a ba penmi le jatna li'u .i le rinsa cusku 
lu je'e .i ma poi cmene cu se cusku mi .ei le jatna li'u ju'e lu mi'a 
krati la nicte cadzu li'u .i le rinsa cu falgau lo cukta gi'e sutra 
cliva .i so'a remna poi nenri le kumfa cu ca'o terpa catlu sy joi cy .i 
cy ca'o cisma .i sy suksa zgana lo du'u le cisma jai jarco so'i denci

ni'o ba bo le rinsa cu xruti gi'e gidva cy .e sy le cmalu kumfa poi 
vasru no remna gi'e se canko no da gi'e ku'i vasru pa brabra minra .i cy 
cusku lu la'a lo pulji cu djica lo nu vidni rejgau fi mi'o .i ku'i mi na 
djica li'u bau la .lojban. gi'e xraci'a so'i pluja makfa sinxa lo xance 
be sy .e cy .i ba zi bo le jatna cu nergau gi'e li'a mutce se spaji gi'e 
cusku lo glico panra be lu mi pu krici lo du'u do cliva li'u .i cy cusku 
lu mi na djica lo nu do rejgau fi mi'a .i se ki'u bo mi na curmi li'u

--
You received this message because you are subscribed to the Google Groups "lojban" group.
To unsubscribe from this group and stop receiving emails from it, send an email to lojban+unsubscribe@googlegroups.com.
To post to this group, send email to lojban@googlegroups.com.
Visit this group at https://groups.google.com/group/lojban.
For more options, visit https://groups.google.com/d/optout.