[lojban] Le petit prince - III

["Jorge Llambias" <jjllambias@hotmail.com>]

ni'o mi ze'u jmibi'o le du'u ny ba'o klama fi makau i le cmalu
noltrube'a noi so'ida preti fi ke'a mi cu noroi simlu le ka jimpe
fi lei memimoi i loi cunso se bacru valsi cu di'i jungau mi roda
i taiku ca le nu nyboi pare'u sanji le mi vinji kei to mi na pirfi'i
le mi vinji i le pixra cu dukse le ka pluja kei mi toi ny preti
cusku di'e mi

-- i le va dacti cu mo

-- i ta na dacti i ta vofli i ta vinji i ta me le mi vinji

i mi jgira le nu jungau ny le du'u mi vofli ibabo ny ki'asku di'e

-- i ue do ba'o farlu fi le tsani

-- i go'i sei mi cumla cusku

-- i ua xajmi

i le cmalu noltrube'a cu bacru lo gleki nu cmila noi mutce fanza
mi i mi djica le nu zu'i junri lei mi malfunca ibabo ny jmina cusku
di'e

-- i ja'o do ji'a klama fi le tsani i ma terdi do

i mi ze'i vismli lo guska'u le cizra pe le nu ny zvati i mi bikla
terpreti

-- i xu ja'o do klama fi lo drata terdi

i ku'i ny na spuda i ny tolvlile se desku le stedu ca'o le nu
catlu le mi vinji

-- i je'u do na ka'e klama fi lo darno mutce fu ta

i ny jinru lo ze'u se senva ibabo ny tolse'a le mi lanpanzi le ny
daski gi'e sfubu lo nu manci catlu le ny dirba

ni'o do se xanri le nu tai makau mi kucli gau le xadba selsku
pe lei drata terdi i mi troci le nu djuno lo se jmina

-- i do klama fi ma doi cmalu prenu i ma stuzi le do zdani i do
djica le nu bevri le mi lanpanzi ma

i ny spuda mi di'e ba lo pensi smaji

--  i xamgu fa le tanxe poi do ke'a mi dunda ku'o fi le nu ca
lo'e nicte ty selfu le nu zdani ly

-- i li'a i ji'a va'o le nu do clite kei mi ba dunda lo skori do tezu'e
le nu ly jorne ca lo'e donri i go'i lo grana

i le se xusra cu simlu le ka jenca le cmalu noltrube'a

-- i xu jorne i ue xajmi sidbo

-- i ku'i va'o le nu gau do ly na jorne kei ly ba klama makau gi'e
ba farcri

i le mi pendo cu za'ure'u bacru lo nu cmila

-- i ku'i ly ka'e klama ma

-- i makau i le sirji crane ly

ibabo le cmalu noltrube'a cu junri te pinka

-- i na vajni i le mi zdani cu tai cmalu

i fau le nu ju'ocu'i badri milxe cu jmina cusku di'e

-- i fa'a le sirji crane zu'i na ka'e klama lo darno mutce



--------------
mu'o mi'e xorxes



_________________________________________________________________
MSN Photos is the easiest way to share and print your photos: 
http://photos.msn.com/support/worldwide.aspx


------------------------ Yahoo! Groups Sponsor ---------------------~-->
4 DVDs Free +s&p Join Now
http://us.click.yahoo.com/pt6YBB/NXiEAA/MVfIAA/GSaulB/TM
---------------------------------------------------------------------~->

To unsubscribe, send mail to lojban-unsubscribe@onelist.com 

Your use of Yahoo! Groups is subject to http://docs.yahoo.com/info/terms/