[lojban] nu tugni la .guskant. [to pu cmene fa lu lo si'o tertidyfingri, joi lo srana be ri li'u]

[selpahi <seladwa@gmx.de>]

la .guskant. pu ciska di'e
> ni'o la bripre jikca zo'u
> sa'u tu'a la gleki noi vliraitru cu mukti lo nu mi jdice lo du'u mi finti no boi remoi be lo porsi no'u la bripre jikca
> i la gleki cu livgau mi lo lojbo cecmu ije so'i lo se jbobau cu sarji lo nu la gleki za'o vliraitru lo catni kibystu jo'u lo catni smitra jaspu
> (to lo nu smaji cu dunli lo nu sarji kei ma'i mi toi)

.i'a .i ĭe lo nu smaji cu simsa lo nu sarji .i la'a dunli ji'a .i mi 
zo'u mi tugni do lo poi'i do xusra ke'a la gleki .i je mi djica lo nu do 
djuno .i ga'a mi so'e jbopre na pu je'a zgana lo pu fasnu (to ka'e pa 
mei lo krinu be lo nu LLG ca'o zukte no da lo nu xagzengau lo tcini toi) 
.i ku'i mi krici lo du'u mi jimpe lo du'u do lifri ma kau

.i pe'i no da ba'e *djica* lo nu do cliva .i la'a fatci fa lo nu la 
gleki do pu livgau .i ku'i pe'i ge nai ri gi nai su'o drata be ri cu 
vlipa lo ka ba'e *livbai* su'o jbopre .i do na nitcu lo ka tinju'i lo 
jai nu fenki jo'a fa la gleki .i lo nu tai se vajni lo nu la gleki cu mo 
kau cu simsa lo nu dunda lo kamvlipa la gleki .i xanri ku'i .i ka'e 
nandu fa lo ka co'u krici lo xanri .i mi se slabu lo se cinmo be do (to 
mi krici toi) .i nandu mi ji'a fa lo ka co'u se vajni lo du'u lo 
malcladu pe lo cecmu cu xusra ma kau .i ku'i la gleki du'e roi pu je 
za'o ca'o di'i jarco lo ka je'a nalkakne lo ka racli spuda gi'a jimpe

.i do djica lo nu la gleki co'u .admine lo ŭitki .i da'i ma basti ra .i 
mi xebni lo nu la gleki ge ze'u pu gunka tu'a lo ŭitki, soi banli, gi 
ku'i ca poi'i so'o da co'a jinvi lo du'u lo nu vimcu ke'a cu sarcu .i mi 
badri lo nu lo tcini pu tai farvi .i la'a do jinvi lo du'u .y la gleki 
ki'u lo nu ri pu livgau do cu za'e mardyjerna lo ka ce'u ji'a se livgau 
noi'a nu xrudu'a .i fegli mi .i zu'u nai lo nu zukte no da poi'o'a 
tolju'i be lo nabmi cu poi'i ke'a ji'a na xamgu

.i xu su'o da kakne lo ka drani pajni .i ma traji lo ka xamgu xo kau 
jbopre .i ma traji lo ka xamgu lo jbobau

~~~mi'e la selpa'i

--
You received this message because you are subscribed to the Google Groups "lojban" group.
To unsubscribe from this group and stop receiving emails from it, send an email to lojban+unsubscribe@googlegroups.com.
To post to this group, send email to lojban@googlegroups.com.
Visit this group at https://groups.google.com/group/lojban.
For more options, visit https://groups.google.com/d/optout.